Unammineq kingulleq: Kalaallit Nunaat Østrigimut unammilerpoq
Kalaallit Nunaat nunarsuarmi pissartanngorniunnermi eqimattani unamminissaminut piareeqqippoq. Østrig ullumi unammineqassaaq. Tamatuma kingorna Frederikshavnimi President's Cupimi unamminerni peqataassapput, nunat arfineq-marluk unammeqatigissallugit.
Obs. Allaaserisami ilanngunneqarpoq Kalaallit Nunaat President's Cup-imi Frederikshavnimi ingerlanneqartussami ilannguttoq, unamminerillu tassani ingerlaqqissasut.
Kalaallit arnat assammik arsarlutik nunanut allanut unammisartut nunarsuarmi pissartanngorniunnermi ullumi nal. 18.00, tassa nunatta nalunaaqutaa malillugu 15.00 Østrigimut unamminissaminut piareerpoq.
Unammisussat tamarmik Sydkorea aamma Norge unammereerpaat. Kalaallit Nunaat aamma Østrig pissartanngorniunnermi ajugaasussatut ilimagineqarnerpanut, tassa Norgemut, ajorsarsimapput, unamminerit 11-43-mik aamma 28-45-mik inerneqarlutik.
Unamminerit kingullersaat
Kalaallit Nunaat nunarsuaq tamakkerlugu pissartanngorniunnerni eqimattakkaarluni unamminerat kingulliussaaq.
Sydkoreamut unamminermi Kalaallit Nunaat 27-16-imik ajorsarpoq. Østrig Sydkorealu unammimmata unammineq naligiinneruvoq, Østrigilu 29-30-mik ajugaalluni.
President's Cup tullinnguuppoq
Norgemi Stavangerimi eqimattakkaarluni unamminerit kingorna Kalaallit Nunaannit nunanut allanut unammisartut President's Cupimut, Danmarkimi Frederikshavnimi ingerlanneqartussamut peqataanissaat qularnarunnaareerpoq. Tassani nunat arfineq-pingasut unammissapput.
Kalaallit Nunaat 7., 9., 11. aamma 13. december unammissapput, qularnarunnaareerporlu Island, Senegal aamma Paraguay President's Cupimi aamma peqataassasut.
Nunarsuaq tamakkerlugu pissartanngorniunnerni President's Cup naggataarutaasumik 13. december unammiffiussaaq, tassani paasinarsissaaq Kalaallit Nunaat VM-imi qanoq inissikkumaarnersoq.