Unamminermi aalajangiisuusumi ajorsartut

OV Helsingborg tunngaviusumik unammisaqattaarnerit ingerlanneqareersullu Eliteserienimut toqqaannartumik anngutinngitsuulaaginnarpoq. Taamaattumik assammik arsartartut timersoqatigiiffiit allat tallimat peqatigalugit anngunniuteqataasariaqalerpoq, unamminerit qulit ingerlanneqareerneranni pitsaanerit pingasut qaffannissaannik qulakkeerinniffiusussamik.

Inissat pingajuata unammissutigineqarnerani unamminermi kingullermi aalajangiisuusumilu OV Helsingborg sapaatiummat unnukkut Stockholmimi 2400-nik isiginnaartoqarluni iluatsitsinngitsooqqippoq Hammerbymut 32-25-mik ajorsarluni.

Hammerby najukkaminni unammisut aallartilluarnerpaapput minutsillu 15-it ingerlareerneranni 10-2-mik siuaqqallutik. OV Helsingborg peqataaneruleraluartoq 16-12-imillu isertitaqaraluartoq unamminerup qanoq inerneqarnissaa pissanganarsinngisaannarpoq. Hammerby ullormi tassani pitsaanerpaavoq ukiumilu unammisaqattaarfiusumi tullermi Eliteserienimi unammisalissalluni, OV Helsingborg Sverigemi pitsaanerit tulliini Allsvenskanimi unammisartooqqissasoq.

- Ajoraluartumik unammeqataalluarpallaanngilanga, unamminerup kingorna Angutimmarik Kreutzmann Sermitsiaq.AG-mut oqaluttuarpoq.

- Assammik arsartartut pingaarutillit arlaliulluta ulluluppugut, taamaalillunilu ilungersunarsilluni.

Angutimmarik Kreutzmann marlunnik isertitaqarpq.

Sverigemi siunissaq isumaliutigigaa
Sungiusaasuuneq Ian Marko Fog kingullermeerluni OV Helsingborgimut siuttuuvoq. Danmarkimi nunanut allanut unammisartuusimasup taassuma ukiut marluk matuma siorna unammisartut Eliteserienimit Allsvenskanimut appartitaammata Angutimmarik Kreutzmann Odder Håndboldimit nuutsippaa.

Sverigemi assammik arsartartutut ingerlaqqissanerluni Angutimmarik Kreutzmannip maannakkorpiaq isumaliutigaa. OV Helsingborg isumaqatigiissutip sivitsorneqarnissaanik soqutiginnittorujussuuvoq.

OV Helsingborgermiut busserlutik Helsingborgimiit Stockholmiliarput. Sapaammi ullaakkut nal. 10.00 aallaramik ataasinngornermi ullaakkut nal. 05.00 angerlamut apuupput.