Unamminissat pissanganartut pingasut
Sapaammi Nuummi Faxe-Kondi illoqarfimmi unammiuaarsitsineri ingerlanneqaqqissapput
Qaammatit marlussuit qaangiuppata assammik arsartartut inersimasut Ilulissani pissartanngorniutissapput. Timersortartut sungiusarput pikkorinnerpaaffissartik anguniarlugit illoqarfinnilu unammiuaarnerit ingerlanneqarput. Taamattaaq sapaatip akunnerata naanerani uani Inussivimmi unammiuaartoqassaaq.
Angutini GSS II aamma NÛK II unammissapput. Unamminissaq taanna nal. 13.30 aallartissaaq, ilimagineqarsinnaavorlu GSS II U19'imik unammisartuutiminik sassartitsissasoq, taakkumi ukioq manna sukalavissut paasinarmat. U19'it pissartanut GSS I'imut unammillerluarsinnaapput.
Nal. 15.00 GSS aamma NÛK arnartai naapissapput. Faxe Kondi-mik unammiuaarnermi suli NÛK arnartai GSS'imut ajugaanikuunngillat. Immaqa sapaammi kiisami ajugaassapput.
Unammisaqattaarnerit naggaserlugit GSS I aamma NÛK I naapissapput. Unammineq naligiittoq pissanganartorlu naatsorsuutigineqarsinnaavoq. NÛK I'p angutitaasa GSS suli unammiuaarfimmi matumani ajugaassigisinnaasimanngilaq. Ilaannili ajugaangajaavittaraluarput. Immaqa NÛK ullumi GSS ajugaaffigisinnaassaruttoraa - pissanganarnissaali qularnanngilaq.