Unammisartugut sanngiillipput
Aqqaluk Sørensen, angutit nunatta assammik arsarlutik unammisartuini pingaarutilik, nunarput sinnerlugu arsaqataaniarani nalunaarpoq
Odder Håndboldimi tunuarsimasup nukittuup ilinniarnini nunatta assammik arsarlutik unammisartuini peqataanissaminit pingaartinneruaa. Panamerikamiut Pissartanngorniunnissaasa tungaanut piareersaatigalugu sungiusarnissani aammalu aappaagu juunimi Argentinami pissartanngorniunnerit ingerlanissaani peqataaniarani nalunaarpoq.
Danmarkimi 1. divisionini pitsaanersat akornanni Aqqaluk Sørensen takutitsilluartarmat soorunami naatsorsuutigineqaraluarpoq, Aqqaluk nunatta unammisartuini Panamerikamiut Pissartanngorniunnissaani pingaarutilimmik inissisimassasoq.
- Aasamut Argentinamut peqataassaguma ilinniarninnut akornutaassaaq. Peqataassaguma qaammatip missaa atussavara sungiusaqagiilluta katerisimaarnissamut, angalanermi aammalu pissartanngorniunnermi. Unammersuarnissami peqataassagaluaruma soraarummeernissanut peqataasinnaanngilanga. Taava kingusinnerusukkut "napparsimanikutut" soraarummiissaanga tamannalu nakerinngilara, Aqqaluk Sørensen Sermitsiaq.AG'mut oqarpoq.
- Soorunami neriuutigaara kingusinnerusukkut nunanut allanut unammisartunut peqataaqqissinnaanissara.
Panamerikamiut Pissartanngorniunneranni peqataasut nunarsuaq tamakkerlugu 2013-imi pissartanngorniunnissamut anngunniuffigaat, nunat panamerikamiut pingasut peqataatitaqarfigisinnaasaat. Pisarneq naapertorlugu ingerlasoqassappat Argentina aamma Brasilia inissat siulliit pingasut pissavaat, pingajuallu Chile, Cuba aamma Kalaallit Nunaata akornanni unammissutigineqassapput.