Uniunngivissoq: Unamminermut kingullermulli anngutinngitsoorpoq
IBU World Cupimi unamminermut kingullermut, fællesstartimut, Ukaleq Slettemark anngutinngitsoorpoq. Sprintimi unamminermi Ukaleq Slettemark nr. 81-nngorpoq, sisorarlunilu unamminerit peqataaffigisani naammassillugit.
Ukaleq Slettemark sisorarluni unammisaqattaarnini naammasseqqammerpai. IBU World Cupimi peqataanermini kingullermi, sprintimi 7,5 kilometerimik isorartussuseqartumi, arfininngormat 18. marts unammingami nr. 81-inngorpoq.
Unamminermi peqataasut 104-pput, Ukaleq Slettemarkilu nr. 81-itut apuukkami ajugaasumit minutsinik pingasungajannik kingulliulluni apissippoq.
Sprintimi ooqattaarfissat marluusut Ukaleq Slettemarkip uniunngivikkaluarlugit, taamaattoq ujakkaarnermini sukkavallaarsimanngilaq. Inissinnermi 30-t siulliit fællesstartimut, sapaammi 19. marts unammissutigineqartussami, annguttussaammata, Ukaleq Slettemark anngutinngitsoorpoq.
- Sukkanerpaarsuunngilanga, uniunngivillungalu apississinnaasimangama nuannaarutigaara. Taama angusaqarneq aappaagussamut suli sukataarnerunissamik kajumilersitsivoq, Ukaleq Slettemark Facebookimini angusani pillugu allappoq.
Unamminissap tungaanut napparsimasimasoq
Ukaleq Slettemark ujakkaarluni unamminerit aallartilluarpai. Junior VM-imi peqataagami unamminermi siullermi nr. 13-itut inissippoq.
VM-imili unamminerit kingulliit ilaanni timersornermi angusinnaasani pitsaanerulertinnissai tikinngitsoorsimallugu oqaluttuarpoq. Junior VM naammassilivissoq Ukaleq Slettemark napparsimalerpoq, malersuullunilu unamminissamut peqataanissaraluani taamaatiinnartariaqarsimallugu.
Junior VM-ip naammassisimaneranit ullualuit qaangiutiinnartut IBU World Cupimi unamminermi kingullermi peqataavoq.
Ujakkaarluni unammisaqattaarnerni 2022/2023-imi Ukaleq Slettemark IBU World Cupimi unamminissani 15-ini peqataasussatut allaqqavoq. Taakkunannga unamminerit marluk peqataaffiginngitsoorpai napparsimaneq pissutigalugu. Unamminerni sinnerini peqataaffigisaani 13-iusuni, unamminerit pingasut uniunngivilluni peqataaffigai.