VM-mi bronzennattoq: Misigisaq ingasaqaaq
Lars Lennert Abelsen taekwondomi nunarsuarmi pissartanngorniuttoqarmat bronzennappoq. Misigisaq ingasaqaaq, aammali qaffasinnerpaat akornanniilluni tamaviaarnaqaaq, taanna oqaluttuarpoq.
Kalaallit Nunarput nunarsuup assiliartaani ersarisseqqippoq Kazakhstanimi taekwondorluni nunarsuarmi pissartanngorniunnermi ataasinngornermi 21. august nunarput bronzennatsinneqarmat.
Angut, maanna imminut tul-ertartut nunarsuarmi kakkannersaasa ilaattut imminut taasinnaanngortoq, 4. dan-imik qernertumik qitequtilik tassaavoq 33-nik ukiulik Lars Lennert Abelsen.
- Unammissutigisatsinni bronzennalluni misigisaavoq pikkunartoq. Unammersuarnermi angusakka assut naammagisimaarpakka. Ukiunimi arlalinni anguniarnikuuara, taamaammat aamma nuannaraara inersimasuni unamminermi taamak angusaqarsinnaagama, Lars Lennert Abelsen Nuummeersoq oqaluttuarpoq.
Unammissutigineqartumi, Lars Lennert Abelsenip bronzennaffigisaani taekwondortartut 20-it missaanni peqataapput, Larsillu Rusland, Argentina aamma Grækenland sinnerlugit unammeqataasut ajugaaffigivai.
- Unammisakka taekwondomi misilittagaqarluartuupput ukiunili arlalissuarni timersuut misilittagaqarfigalugu. Unamminerup nalaani qanoq periaaseqarnersut alapernaaqqissaarpakka. Misigisarlu pikkunaqaaq nunat timersornerup tungaatigut angisoorsuit sinniisaat ajugaaffigisinnaallugit, Lars Lennert Abelsen oqaluttuarpoq.
Utoqqasaat akornannut pinissaminut inuukkunnaaliivissoq
Lars Lennert Abelsen ukiuni arlalissuarni taekwondortartuuvoq taamaammallu nunat tamalaat akornanni unammiuaartarnernik misilittagaqarluarpoq. Taanna siusinnerusukkut pitsaanerit tallimat akornannut pisinnaasarsimavoq, maannali pitsaanerit pingasut akornanniilernerminik assut naammagisimaarinnippoq.
- Inersimasut akornanniinninni suli ukiut arlalialuit ingerlasinnaavunga. Taamaattorli assut pissanngatigaara utoqqasaat akornannut pinissara, tamannalu pissaaq 35-nik ukioqaleruma. Massakkoqqissaaq aallutara tassaavoq qasujaassusera timikkullu pisinnaasakka annikillisinnaveersaarlugit ineriartorninnik aallussineq, taanna oqaluttuarpoq.
Taamatuttaaq oqaluttuaraa nunarsuarmi pissartanngorniunnerit sioqqullugit qaammaterpassuarni sungiusarneq annertoorujussuaq ingerlassimasani assut pikkunarsimasoq.
- Utoqqasaanut pinissannut sungiusaatigilluarpara. Maanna teknikkera timersuummilu aqqusaagassat aalluppakka, suli ineriartornissara kissaatigigakku. Assummi pissangagivara, ukioqatigiikkaani maannakkut peqataaffigisanni naggataarumaarnissara aappaagu utoqqasaanut nuutsinnanga. Assut kissaatigaara sulissutigalugulu angusakka pitsaasut ingerlatiinnarsinnaassallugit, Lars Lennert Abelsen oqarpoq.
Inukkuluk G. Lennert aamma peqataavoq tul-imi qernertumik qitequtillit 2. dan-it unammersuarneranni, taannali finalimut angusinngitsoorpoq, Grækenlandimut pointinik ikikkaluartunik ajorsaqqalaarnermigut ujaminnanniuttut akornannut pinngitsoorluni.