Volleyball-imi angutini pissartat finale-ssanngillat
Volleyball-mi siorna pissartaasut GSS Nuummeersut GM-imi finale-mut anngussinnaajunnaarput. Illuanilli siorna sølvinnattut AVI Maniitsumiik finale-mut anngupput.
Volleyball-imi GM unamminerit aallarniutaasut kingulliit ullumikkut ingerlanneqarnissaat pissangarluinnartussanngorpoq. AVI Maniitsumeersoq marlunngornermi IVK-mut Ilulissaneersumut 3-0-mik ajugaanermigut finale-mut annguppoq. Pingasunngornermi IVK aamma KT-VI Kangaamiuneersoq unammilerpata ajugaasut finale-mut anngutissapput.
– Pikkorissunik arlalinnik nutaartaqarpugut soorlu Ole Karl Kreutzmann aamma marlulissat Minik aamma Pilo Rasmussen, taama oqaluttuarpoq volleyball-ertartut kattuffianni siulittaasoq Aalipaaraq Kreutzmann aamma AVI-mi misilittagartoortaasoq.
Arnat ullumikkut unamminissaat aamma pissanganarluinnartussaavoq. GSS Nuummersoq siorna sølvinnattoq allanit pitsaanerulluinnartoq finale-mut anngutereerpoq ullumikkullu marloriarlutik ajorsarluarunilluunniit finale-mi inissartik annaasinnaanagu. Unnugu unamminermi kingullerpaami unammisussat KT-VI Kangaamiut aamma QVP Qaqortumeersoq finale-mut anngunniutissapput. Siorna pissartaasut AVI Maniitsumeersoq finale-mut anngussinnaajunnaarpoq.
Aajuku marlunngornermi angusat:
Angutit:
KT-VI – AVI 1-3
GSS – IVK 3-1
KT-VI – GSS 2-3
AVI – IVK 3-0
Arnat:
GSS – KT-VI 3-0
AVI – QVP 2-3
GSS – IVK 3-0
KT-VI – AVI 3-2
QVP – IVK 3-1