Vuvuzela VM-ernermi nipiliortuassaaq
Nunat tamalaat isikkamik arsaattartut kattuffiata vuvuzelamik VM-eqarnermi atoqqusiunnaarusunngillat, naak qarlortaatip taassuma nipiliuutaanersua arsaattartunit tv-kkullu isiginnaartartunit qinngarineqaraluartoq.
Tusaamaneqaqisumik qinngarineqaqisumillu vuvuzelamik atoqqusiunnaartoqassanngilaq, nipiliortaat Sydafrikami isikkamik arsaalluni VM-eqarnermi oqallisaasimaqisoq.
Nunat tamalaat isikkamik arsaattartut kattuffiata (FIFAp) qarlortaammik atorunnaaqqusiunnaarneq atuutilersinnianngilaa.
- Vuvuzelaat arsaattarfinni inerteqqutigineqassanngillat, FIFAp oqaaseqartartua Stan Schaffner oqarpoq.
Arsaattartorpassuit qarlortaat taanna nipitoqisoq pillugu naammagittaalliorput, soorlu aamma nunarsuarput tamakkerlugu tv-kkut isiginnaartartut taamaaliortut. VM-ernermik pisortaq, Danny Jordaan sapaatiummat oqarpoq, vuvuzelaat inerteqqutigineqalernissaat eqqarsaatigineqartoq.
Vuvuzelaatinik nioqquteqartartut nalunaarput nipiliunnginnerusunik maanna sanatitsillutik, Ritzau taamak allaaserisaqarpoq.