Ajugaaniutivinnermi Kalaallit Nunaat peqataassanngilaq

Nunarsuarmi assammik arsarluni pissartanngorniunnissamut anngunniunnermi Kalaallit Nunaat USA-mut Mexico Citymi unamminermini aalajangiisuusumi ajorsarpoq.

Nunanut allanut unammisartut Mexico City-mi olympiadeqarfiunisuusumi tmersortarfissuami assilineqarput.

Unammisartut pakatsisimaqisut, unamminerup kingorna paasiniarsarivaat, unamminermi naligiiffioqisumi suna ajutoorutaasimanersoq, tassami unamminermi Kalaallit Nunaat annertuumik peqataavoq akiuulluataarlunilu, tassanilu  unamminerup immikkoortuisa aappaani målinik pingasunik siuaqqaleraluarluni 23-20-mik.

3-3, 6-6, 10-10, 13-13 aamma kingullermik 15-15 tassaapput unamminerup siulliup ingerlanerani inissisimaffigineqartut. Unamminerup naligiiffiunera immikkoortut aappaata aallartinnerani ingerlateqqinneqarpoq. 19-19 taava Kalaallit Nunaat siuarpoq 23-20, unamminerli sivikitsumik naligiiffioreersoq 23-23, 26-26, tamatuali kingorna USA siuariartupallappoq 27-30 unamminerup naammassinissaanut minutsit tallimaannanngortut. Minutsit marluinnanngortut kalaallit angummakkiartoqqikkaluarput 29-30, USA-llu unammisartui ajugaanissaminnut iluatsitsipput marlunnik isertitsillutik 32-30.

Unamminerup inernerata naqissuserpaa Kalaallit Nunaat ajugaaniutivinnissamut ingerlaqqittussaajunnaartoq. Taamaalilluni Cuba aamma nuna unammiffiusup unammisartui Mexico ajugaaniutivittussanngorput.

Unammineq naammasseqqammertoq Sermitsiamit qatanngutigiit Kreutzmannikkut, Akutaaneq aamma Angutimmarik Sermitsiamit oqaloqatigaagut. Soorunami pakatsisimmaarput. VM-imut peqataanissaq annertoorujussuussagaluarmat.

Akutaaneq Kreutzmann

Ukiut arlalissuit Danmarkimi assammik arsarluni qaffasinnerpaaffiusumi unammisartooreerluni aammalu Japanimi piffissami ataatsimi unammisartooreerluni, Akutaaneq maanna Kalaallit Nunaannut uternikuuvoq.

- Saassussinermi malinnaaniarneq ajornakusoortorujussuanngorpoq. Illersuinerli  ajunngitsumik ingerlavoq. Ajoraluartumilli akuersaaruminaatseqisannik, uanga siornatigut piginnaasakka maannakkut piginnaasarisinnaajunnaarpakka.

- Tamanna uggornarpoq, unamminerit peqataaffigisartakkatta ikittuinnaanerisa kingunerivaa. Ukioqqortusiartornerlumi aamma malugineqarsinnaavoq.

Akutaaneq Kreutzmann 34-nik ukioqarpoq, maannalu Nuummi najugaqarpoq ukiup aappaa avillugu Ilulissani najugaqareerluni, aalisartutullu sulereerluni.

- Unammisarnerit ikippallaarnerisa kingunerisaanik kukkusarnigut amerlagisassaapput, tamannalu USA-mit iluanaarutigineqartarpoq, Akutaaneq Kreutzmann oqarpoq.

Angutimmarik Kreutzmann

Angutimmarik inuusunnerungaatsiarluni taamani nunarsuarmi pissartanngorniunnermi peqataaneq misiginikuuaa.

Ukioq 2007-mut uteriarluta, VM Tyskland-imi ingerlanneqarmat. Angutimmarik ilisimaneqanngilaq unamminerup aallartinnerani, kisianni tamanna sukkasuumik allanngortinneqarpoq. Angutimmarik isertitseqattaarpoq. Unamminerit arfinillit siulliit kingorna unamminerup isertitsiffiulluartuattut inissippoq. Australiamut unamminermini isertitat 15-it eqqanaarneqarmata.

- Soorunami tamaasa eqqaamavakka. Misigisaq annertuvoq, Angutimmarik oqaluttuarpoq

- Misigisaq taama annertutigisoq aamma misigeqqissallugu nuannissagaluarpoq. Maannali nassuerutigisariaqalerpara uannut nunanut allanut unammisartutut piffissap taamaatinnissaa qanilliartortoq. 36-nimmi ukioqarnera malugisinnaavara.

- Aamma malugisinnaavarput unammisarnigut ikippallaartut. Tamanna ilaatigut isumaqarpoq unamminerni, soorlu maani Mexicomi, unamminerit ingerlanerini unammisarnitsigut angummassinnaajunnaariartortartugut, unammisassagut muminganik unammisarnermikkut pitsanngoriartuinnartut .

- Danmarkimi ukiut nuannersut atoreerpakka aamma nuannaarutigaakka assammik arsarlunga misigisassarsiorfigisimasakka, Angutimmarik oqarpoq.

Angutimmarik Kreutzmann aamma tassaavoq Kalaallit Nunaata U18 angutit nunanut allanut unammisartuinut sungiusaasuat, qularnanngilarlu suliassaqarluarumaartoq Mexicomit angerlaruni tassami sungiusartagai nunarsuarmi pissartanngorniunnissamut anngunniunnissamut peqataasussaammata.

Bronzennanniunneq

Nalunaaqutaq 20.00 Kalaallit Nunaata nalunaaqutaa malillugu, Kalaallit Nunaat USA-mut ajorsareerluni akisinissamut periarfissaqassaaq, tassami nunat taakku marluullutik bronzinnanniullutik unammisussaapput.

Powered by Labrador CMS