Akit 2025-mi qaffaqqissasut

Assartuinermi akit qaffakkiartornissaat akillu nalinginnaasumik qaffakkiartornissaat 2025-mi ilimanaateqaqaaq.

Nunatsinni pisiniarfissuit namminersortunit pigineqartut marluk, Brugseni aamma Pisiffik taama oqarput.

Sermitsiap pisiniarfiutileqatigiit taakku marluk aperai pissutsit atuisut isaannit isigalugit 2025-mi qanoq issanersut apeqqutigalugu. Pisiniarfiutileqatigiinni sulisut akit pinnagit pisiniarfiit nutaat suliniutigisatillu oqaluttuarerusunneruaat. Akilli qaffassinnaanerat pisinnaasoq, marluullutik oqaatigaat.

- Ukioq nutaaq qilanaaraarput, tassani ilaasortatsinnut pisiniartartutsinnullu pisiniarfinni pitsaanerpaanik periarfissaqalernissaa piareersimaffigaarput, tamatumalu saniatigut niuernitta nutaanik suliniuteqarnikkut allilernissaa qilanaaralutigu. Tamatumunngali peqatigitillugu aningaasartuutit qaffakkiartornerannut akigititallu qaffakkiartornerannut unammilligassaqaqaagut. Tamakku tamarmik nioqqutissanik pisinermiit assartuinermut, pisiniarfinnilu ulluinnarni ingerlatsinermut aningaasartuutit ilanngullugit pineqarput, Brugsenimi pisortaagallartoq Kent Helberg Sermitsiamut oqarpoq.

Niuernerup silarsuaani akit allanngorartorujussuusut

- RAL-ip Nukissiorfiillu akinik qaffaanerat malugissavavut, tamatumunnga ilanngullugu piffissami nalorninartorsiorfiusumi suli inuuvugut, nunarsuarmimi aaqqiagiinngitsorsiorfiusumi inuuvugut tamannalu nioqqutissanik pilersuinermut nioqqutissallu akiinut sunniuteqartorujussuulluni.

- Taamatut ineriartornerup qularnanngitsumik kingunerissavaa 2025-p ingerlanerani akit qaffannissaat. 2024 tamakkerlugu niuernermi akit allanngorarnerujussuat pissutigalugu ilungersunartorsiorpugut, tamatumunngalu naleqqussarnissatsinnut tamatigut piginnaaneqarneq ajorpugut, tamannalu ukiumut angusatsinni takuneqarsinnaassalluni. Tamanna 2025-mi pitsanngorsartariaqarparput.

Kent Helbergip akit qaffakkiartoraluartut 2025 qilanaaraa.

- Nuussuarmi pisiniarfissuarmik nutaamik kusanartumillu 2025-mi ammaanissatsinnut qilanaarpugut, tassani Brugseni Natalie nutaaq pilersinneqaleruttorpoq. Pisiniarfitoqqap saniani pisiniarfissuarmik nutaarluinnarmik pilersitsiniarpugut, taanna pisiniarfissuarmik nutaaliaasumik pitsaasumillu ingerlatsinissamut atortussarpassuaqassaaqi, Nuummi nutaamik najoqqutassiuissalluni. Pisiniarfik nutaq ammarneqarpat illutoqqat isaterneqassapput, pisiniarfiup eqqaani biilit uninngavigisartagassaannut nioqqutissanillu tunniussinissamut inissaqarluassalluni.

- Aammattaaq qarasaasianik atortorissaarutissanillu pisiniarfitta nutaap, Powered by Brugsenip, 2024-mi oktobarip 18-ianni ammarneqartup ineriartortinnissaa qilanaaraarput. Pisiniarfik niuerfimmi pineqartumi inissilluareerpoq, pisiniartartutsinnit ilaasortatsinnillu ilassilluarneqarnera tupaallaatigaarput. Pisiniarfiit nutaat saniatigut illoqarfinni assigiinngitsuni pisiniarfiit allat aserfallatsaaliornissaat nutarternissaallu pilersaarutigaarput, Kent Helberg oqaluttuarpoq.

Akisussaaffik immikkut ittoq

- Kalaallit Nunaanni Brugseni atuisunit pigineqarpoq, taamaattumillu inuiaqatigiinnut immikkut ittumik akisussaaffeqarpugut, siulersuisuni siulittaasoq Avijâja Rosing-Olsen oqarpoq.

- Inuiaqatigiinnut akisussaaffeqarnerput eqqumaffigisorujussuuarput, tassa inuiaqatigiinni akisussaassuseqarluta piujuartitsillutalu ineriartortitsinissatsinnut, aamma nioqqutitsinnik akinillu aalajangersaasarnitsinni unammillersinnaanissatsinnut. Tamatuma peqatigisaanik akitigut neqeroorutitsigullu unammillersinnaanissatta sulissutiginerani Divi Plussi aqqutigalugu agguaasarnitsinni politikerput naapertorlugu, 20 millionit koruunit ilaasortatsinnut utertereerpavut.

- Tamatuma saniatigut najukkami aningaasartuuterpassuaqarlutalu aningaasaliissuteqartarpugut, tassanilu sinniisut aqqutigalugit peqatigiiffiup sulinerata ataavartinnissaa ineriartortinnissaalu kissaatigaarput. Tamanna allanngortinnianngilarput, ilaasortatsinnut sullitatsinnullu pingaaruteqarmat, tamannali peqatigalugu isumaqarpoq niuernermi allanngorartupilussuarmi ineriartornermut suli pitsaanerusumik naleqqussarsinnaasariaqartugut.

 Pisortat nutaat

- Brugsenip ukiorpassuarni niuertarfiunerata suliffiullu ineriartortissimasatta illersornissaat pingaartipparput. Taamaattumik aalajangerpugut qullersaqarfipput annertusineqassasoq, taamaalilluta pisortaanerup saniatigut tuniniaanermut ingerlatsinermullu pisortaq aamma aningaasaqarnermut pisortaq atorfinitsinneqassapput, Avijâja Rosing-Olsen oqarpoq.

- 2024-p aallartinnerani Brugsenip Qinngutsinni nammineerluni akiliisarfik nutaaq ammarpaa, ukiullu ingerlanerani pisiniarfinni amerlanerusuni aaqqissuussineq atuutilersipparput, taamaalilluni Brugseni Ilulissani, Brugseni Sisimiuni aamma Brugseni Qaqortumi pisiniartunut aaqqissuussineq maanna neqeroorutigineqarsinnaalluni. Pisiniarfinni amerlanerusuni nammineerluni akiliisarfiit 2025-p ingerlanerani atuutilersissavavut, niuernermut attaveqaqatigiinnermullu pisortaq Benny Reffeldt Otte oqaluttuarpoq.

Pilersuisut tatineqartut

Pisiffik A/S-ip 2025-mi akit qaffannissaat aamma ernummatigaa. Suliffeqarfissuulli pilersuisut sapinngisamik tatiniarai, niuernermut, attaveqaqatigiinnermut Suliffeqarfiullu inuiaqatigiinnut akisussaaqataaneranut pisortaq Tina Hansen oqarpoq.

- 2024-mi pisoqarneratut Pisiffimmi akinik ineriartortitsineq qitiusumik sammineqassaaq. Naak assartuinermi akit nioqqutillu akitsuutaat killilimmik sunniuteqarfigigaluarlugit, pisisartutta 2025-mi pilersuisutsinnut sakkortuumik isumaqatiginninniarnikkut akit qaffassinnaanerisa kinguneri annikillisinniartuassavaat, Tina Hansen oqarpoq, Akikimilu pisiniarfiit, suliffeqarfissuup akikinnerusunik tuniniaanerani pingaarnersaasut erseqqissarlugu.

- Pisiniarfiit Akikimik taaguutillit 2025-mi pitsaasumik ineriartortinnissaat qilanaaraarput, akikitsunik aalajangersimasumik atuutsitsinitsigut pisiniartartuvut ulluinnarni akikinnerusumik inuuneqalersinnaapput.

Pisiffimmi ukiumi matumani pisussat annerpaartaat tassaavoq, Sisimiuni pisiniarfiup nutaap 2025-p naanerani ammarneqarnissaa.

- Illu nutaaliaasoq Akikimik pisiniarfittaqassaaq quersuartalimmik, Torrak Fashionimik pisiniarfeqassalluni kusanartumik neriniartarfeqassalluni 80-it missaanniittunut inissalimmik. Aningaasaliineq tamanna Sisimiuni niuernermut nukittorsaataassaaq, sullivinnik pilersitsissalluni illoqarfimmilu neriniartarfiit amerliallassallutik, Tina Hansen oqarpoq, taannalu Pisiffimmi piujuartitsinermik suliniutinut akisussaavoq.

- Pisiffimmi, Akikimi Sparimilu nerisassanik igitsisarneq annikillisinniarlugu suliniuteqarpugut. Aammattaaq sulisut inuusuttut ineriartornissaat pitsaanerulersinniarlugu ilinniartitaanermut siunnersortissamik sulinerminnilu tapersersortissaminnik atassuteqarnissaat qulakkeertarparput. Aammattaaq pisiniartut paarnanik naatitanillu nutaanik pisisarnissaat anguniarlugu suliniuteqarpugut.