Morten Rutkjær, angutit isikkamik arsaattartut nunanut allanut unammisartuinut sungiusaasoq, arsaattartut peqatigalugit ulluni makkunani Østrigimiippoq.
Taakku Amateur National Teams Nations Cup 2025-mi unammiuaarnermi peqataanermikkut arsaqatigiit misilittakkamikkut nunanilu allani nuimanerminni ataqatigiinnertik pitsanngorsassavaat.
Morten Rutkjær, angutit isikkamik arsaattartut nunanut allanut unammisartuinut sungiusaasoq, arsaattartut peqatigalugit ulluni makkunani Østrigimiippoq.
Taakku Amateur National Teams Nations Cup 2025-mi unammiuaarnermi peqataanermikkut arsaqatigiit misilittakkamikkut nunanilu allani nuimanerminni ataqatigiinnertik pitsanngorsassavaat.
Kalaallit Nunaanniit unammiuaarnermi peqataaneq nunat allat naapinnissaannut periarfissaavoq, tassanilu unamminerit pingaarutillit arsaqatigiit ineriartorfigalugillu pitsanngoriartorfigissavaat.
- Sungiusaasumiit iligiinnut arsaqatigiit akiuutillaqqissut nunani allani unammisartunut pikkorissunut unammillersinnaasut KAK-miit ineriartortinneqaleruttorput. Concacaf-imit itigartinneqarnitta kinguneranik KAK-mi tunniutiinnassanata aalajangernikuuarput. Illuatungaaniilli kalaallit arsaattartui pikkorissut, nunani tamalaani isikkamik arsaannermi ilanngussinnaasut nunarsuup sinneranut nittarsaannissaat siunniullutigit, nunanut allanut unammisartut sungiusaasuat Morten Rutkjær Østrigimi sungiusarfimminniit AG-mut oqarpoq.
Sapaatip-akunnerani matumani marloriarluni pikkorissunut unammisoqassaaq – Østrigimut Sloveniamullu – taakku tamarmik Wienimi pissapput.
- Unammisartugut piareersimarpasipput qasujaallisarluarnikuullutillu – malugineqarsinnaavoq. Sungiusarluarnikuupput aasaq mannalu unammisaqattaarnikuullutik, taamaammallu unamminissaminnut piareersimalluarlutik, sungiusaasumut ikiorti Nukannguaq Zeeb oqarpoq.
Iligiit tunniusimalluarnerat ineriartornerallu sungiusaasunit tulluusimaarutigineqartoq malunnarpoq.
- Naalagaaffiit pingasut pikkorissut unammiuaarneranni nunanut allanut unammisartutta peqataanerat tulluusimaarutigaara. Immitsinnut nittarsaannissatsinnik periarfissiillunilu Kalaallit Nunaanni isikkamik arsaannerup pimoorunneqarneranik takutitsinissatsinnik periarfissaqalerpugut, Morten Rutkjær oqarpoq.
Kalaallit Nunaata nunani tamalaani isikkamik arsaannermi akuerineqarnissaanik anguniagaqarneq, Østrigimi unamminerni peqataanermi qalliallassaaq.
Kalaallit Nunaat Østrigimut ataasinngornermi unammigami ajorsarpoq, 5-1-imik unammineq inerneqarami.
