Aningaasassaaleqineq pissutigalugu unammiuaarnissaq annertooq KAK-p kinguartippaa
Arsaattartut Kattuffiannit (KAK) aningaasat kingulliit pissarsiarineqarsinnaasimanngillat, taamaattumik angutit futsalimi Nordic Cup-ernissaat ukiamut pisussaq kinguartinneqarpoq.
Leiff Josefsen
Nunat tamalaat akornanni unammiuaarnissamut Nordic Cup-imut aningaasat kingulliit pissarsiarineqarsinnaasimanngikkaluartut, KAK-p aaqqissuisuunissani taamaatiinnanngilaa.
KAK-p 2025-mi 2026-miluunniit Nordic Cup-imik aaqqissuinissaq sulissutiginiarpaa, taamaalillutik aningaasat pisariaqartinneqartut pissarsiarinissaannut piffissaqarnerussapput, KAK-p tusagassiuutinut nalunaarutaani ilisimatitsissutaavoq.
Nunat arlallit peqataanissaminnut nalunaarsimagaluarput
- Nunat allat Kalaallit Nunaannut peqataarusuttut tulluusimaarutigaagut, neriuppugullu tulliani unammiuaartitsinissarput iluatsippat aamma taakku piareersimajumaartut. Suliffeqarfiit namminersortut pisortallu assigiinngitsut suliniummut timersornermut nunatsinnullu iluaqutaasumut tapersersuisut qujamasuutigeqaagut, KAK-p siulittaasua Kenneth Kleist oqarpoq.
Qaammatini arfineq-marlunni KAK aningaasaliisussarsiorsimavoq, arlallillu aningaasaliisimapput, unammiuaarnerilli Kalaallit Nunaata arlaleriarluni peqataaffigisarsimasaasa ingerlanneqarnissaannut naammassimanngillat.
Kroatiamukarnissaq suli pilersaarutaavoq
Aasap kingorna ukiarulu angutit inuusuttullu futsalimi nunanut allanut unammisartut katersornissaat KAK-p maannakkut sulissutigaa. Angutit futsalimi nunanut allanut unammisartut septembarimi Kroatiami unammiuaarnermi Futsal Weekimi peqataanissaat aamma suli pilersaarutaavoq.
