Arnaq Bourup Egede: – Arnat nunatsinni arsaannermi sumiginnarneqarput – allannguisoqartariaqarpoq

Arnap Bourup Egedep KNR-TV-mi Qeqertarsuarmit toqqaannartumik GM-ertoqarnera isiginnaaramiuk anersaaruluppoq. Angutit arsarlutik pissartanngorniunnerat isiginnaarpaa.

Arnap, ukiuni 18-ingajanni arsartartuusoq, timersorneq nuannaarutigingaarpaa, aammali unammisartuunermini arnanut angutinullu assigiinngisitsineq pakatsissutigingaartarlugu:

- Ukiorpassuarni arsartartuuninni assortorneqarsinnaanngitsumik arnat angutillu assigiinngitsumik pineqartarnerat ersaritsigisoq iliuuseqartoqartariaqalinnginnerluni?

Arnat pissartanngorniunnerat TV-kkut toqqaannartumik aallakaatinneqarneq ajortoq

Arnat pissartanngorniullutik unamminerat toqqaannartumik aallakaatinneqarneq ajorpoq, tamannalu assigiinngissutaasoq, Arnaq Bourup Egedep maluginiarpaa.

Arnat aasaq isikkamik arsaannermi pissartanngorniunnerat aallakaatitsivinni soqutigineqanngilluinnartoq, Arnaq oqaluttuarpoq. Aasarli arnat naggataasumik unammimmata pissartanngorniunneq kisimi aaqqissuisunit toqqaannartumik aallakaatinneqarsimavoq, Qeqertarsuarmili angutit unamminerat ullut tamaasa KNR-TV-kkut toqqaannartumik aallakaatinneqartarluni:

-  GM arnani ingerlanneqarmat aallakaatinneqanngillat, aaqqissuisuniit kisimi unammineq kingulleq LIVE-kkut ingerlanneqarluni. Aali Nuummi unammiuaarneq ingerlanneqartoq, KNR-ikkut aajukoralaat. Angutit Qeqertarsuarmi unammiuaarnerat soorunami KNR-ikkut ullut tamaasa aallakaatinneqarput.

Arnanut FINAL4 takorloorneqanngitsoq

Arnat futsalimi unammisartut angutit unammiuaarnerannut Final4-mut peqataanerattut periarfissaqannginnerat Arnaq Bourup Egedep aamma pakatsissutigivaa.

-  Futsal FINAL4 angutit unammiuaarlutik ippassaq naammassipput, arnanut FINAL4 ingerlanneqarnissaa takorluugaanersoq ataasiaannarluunniit kattuffitsinniit qilanaartuutigineqanngilaq.

Taamaattumik Arnaq Bourup Egedep allanngortoqarnissaa kissaatigaa:

- Neriuppunga inuusuttuarartagut siunissagissaarnerpaat ajunnginnerusumik periarfissinneqarumaartut, ilumoortumik kakkattuararpassuit siunissaat iluatinnartigisoq allannguisoqartariaqaleraluarpoq, Arnaq Bourup Egede naggasiivoq.

KAK-ip isornartorsiuineq akivaa – Kalaallit Nunaanni arsaannermi naligiinnerulernissaq pilersaarutaavoq

Arnaq Bourup Egedep arnat arsaannerat pillugu isornartorsiutaanut KAK akissuteqarpoq. Arnat angutillu naligiinnerulernissaannik pilersaarutinik saqqummiussivoq. 

KAK-p siulittaasua Kenneth Kleist akissummini allappoq arnat arsaannerannik inuusuttullu immikkoortortaqarfiinik nukittorsaaneq sulissutigineqartoq, kattuffillu ukioq manna aappaagulu nutaanik suliniuteqassasoq.

-  KAK ukioq manna aappaaguanilu inuusuttunut arnanullu pilersaarutissarpassuaqarpoq, KAK-p siulittaasua, Kenneth Kleist allappoq nangillunilu:

-  Ukioq manna arnat futsalimi Super Cup-ernissaat anguniarlugu iliuuseqarpugut – klubbit uku pineqartut, tassami taakku GM-imi pissartanngorniunnermi pitsaanerpaat sisamat – NÛK, B-67, I-69 aamma UB-68. Sapaatip akunnerata siulianiilli oqaloqatigilerpakka, kisianni pingaaruteqarpoq oqaatigissallugu tamanna Futsal Cup iluatsilluarsimassasoq, taamatullu oqarsinnaavugut.

Aamma arnat futsalimik nunanut allanut unammiuaarnissaannut aamma arnat silami arsaannermi 2025-mi unammiuaarnissaannut pilersaaruteqarnerarput.

KAK TV-kkut toqqaannartumik aallakaatitsinernut akisussaasuunngitsoq

Arnat unamminerat KNR-TV-kkut toqqaannartumik aallakaatinneqarneq ajornerat Arnap Bourup Egedep ilaatigut isornartorsiorpaa.

KAK-mit nassuiarneqarpoq unamminerit sorliit aallakaatinneqartassanersut KNR-imit aalajangerneqartarmat TV-kkut aallakaatitsinernut sunniuteqarsinnaanatik.

- TV-kkut aallakaatitsineq uagut akisussaaffiginngilarput, KNR-imimi namminneq toqqartarpaat. Oqarsinnaavugulli unamminerit takutinnissaat sapinngisatsinnik iliuuseqarfigisimagivut, taamaaliornissartillu neriorsuutigisimavaat, naggataatigulli tunuarput. Tamannalu aamma uagut akisussaaffiginngilarput

Sermitsiap KNR attaveqarfigaa isornartorsiuineq pillugu oqaaseqaqqullugit.