- Qitornavut pillugit sutigut tamatigut iliuuseqartarpugut, sutigullu tamatigut tapersersortarlugit. 2024-milu Danmarkimut nuunnissatsinnut periarfissaqaleratta periarfissaq atorluarparput. Arnaaraq Høegh-Olsen 35-nik ukiulik oqarpoq.
- Aalajangerneq imaannaanngilaq, ilaannikkullu artornalaartaraluartoq, pingaartumik meeqqat angutaat Qaqortumi najugaqarlunilu sulimmat, peqqissimissutiginngilarput, nangilluni oqarpoq.
- Qitornavut pillugit sutigut tamatigut iliuuseqartarpugut, sutigullu tamatigut tapersersortarlugit. 2024-milu Danmarkimut nuunnissatsinnut periarfissaqaleratta periarfissaq atorluarparput. Arnaaraq Høegh-Olsen 35-nik ukiulik oqarpoq.
- Aalajangerneq imaannaanngilaq, ilaannikkullu artornalaartaraluartoq, pingaartumik meeqqat angutaat Qaqortumi najugaqarlunilu sulimmat, peqqissimissutiginngilarput, nangilluni oqarpoq.
Apriilimi siallersumi ilaqutariit taakkua Odensep kitaani inissiarsuarni nutaani Gartnerbyenimi inissiat quleriit sisamaanniittut pulaarpavut.
Ilaqutariit taakkua marlunnik mikisunik aamma qimmeqarput, Aicomik Ulfimillu atilinnik. Taamaattumik niviarsiaqqat angutaat ukiup sisamararterutaanni Odensemut tikikkaangat, tamatigut nuannaarutigineqartarpoq.
- Panitta marluk assammik arsartarnissamut periarfissaqarlualernissaat kissaatigigatsigu, taamatullu maanna periarfissaqalerput.
- Iluatsitsillunga qarasaasiara atorlugu angerlarsimaffitsinnit sulisinnaagama. Qaqortumi suliffeqarfimmut naatsorsuuserinermik sullissisarama, Arnaaraq nangilluni oqarpoq.
Angisuumik takorluugaqartoq
Arnaaraq Høegh-Olsen siusinnerusukkut Odensemi niuernermik ilinniarfimmi ilinniartuunikuummat, Naasu taamanikkut peqatigiimmi minnerusumi assammik arsartalerpoq. Taamaattumik pingasuullutik Odensemut nuunnerat takornartaavallaanngilaq.
Naasup 15-inik ukiullip inuunnera assammik arsarnerinnarmut tunngasuuvoq. Assammik arsartarneq tamatigut eqqarsaatigineqartarpoq.
Arnaaraq Høegh-Olsen paninilu Naasu aamma Aviana
Foto: Knud Fl. Larsen
Naasu Oure Efterskolemi 9. klassemi atuartuuvoq, taanna Danmarkimi inuusuttunut assammik arsarnermik aallussiffiulluartut pitsaanerpaat ilagaat. Ullut tamaasa sungiusartoqartarpoq. Ullorpassuarni ullormut arlaleriartarlutik, nukkassarneq aamma qasujaallisarneq ilanngullugit sungiusarneqartarmata. Naasu kammalaatinilu niviarsiaqqat GOG-miittut ilagalugit, sisamanngornerit tamaasa sungiusartarput. Niviarsiaqqat Oure Efterskolemeersut U15-it efterskolenut allanut Fynimiittunut Jyllandimiittunullu unammiartortarput.
Naasu aappaagu ukiumi atuarfiusumi tullermi Oure Efterskolimi ingerlaqqilluni 10. klassimi atuassaaq, niviarsiaqqanilu U17-ini ingerlaqqissalluni.
- Inuussutissarsiutigalugu assammik arsartartunngornissara soorunami takorloortarpara, Naasu oqarpoq.
Naasup nalunngilaa imminut ikiorniarluni iliuuseqartariaqarluni ilungersorlunilu sungiusartuartariaqarluni.
Takorluukkat angisuut piviusunngortinneqarsinnaanersut, siunissami aatsaat paasinarsissaaq.
Ilaqutariinnit aallunneqartoq
Inuussutissarsiutigalugu assammik arsartartoq Minik Dahl-Høegh niviarsiaqqat akkagaat nuannaartorilluinnagaralugulu.
Timersoqatigiiffiit Assammik Arsartartut Kattuffiata aaqqissugaanik U15-imi U19-milu assammik arsartartut Danmarkimiittut sungiusartikkaangagit, Naasu peqataasarpoq.
Aviana aqqaneq-marlunnik ukiulik peqatigiiffimmi TPI-mi U11-ni unammeqataasarpoq. TPI Paarup Hallernemi unammisarlunilu sungiusartarpoq, taanna ilaqutariit inissiamit najugaannit sikkilerluni tikittariaqartumi ungasinngitsumiippoq. Aviana taassuma ungasinngisaani Åløkke Skolemi atuartuuvoq.
Taakku pingasuullutik assammik arsarluni unamminerit angisuut tv-kkut imaluunniit toqqaannartumik isiginnaartarpaat.
Aasaanerani atuanngiffeqarnissartik qilanaarigaat
- Aasaanera tamaat Qaqortumi angerlarsimasussaanerput soorunami qilanaareqaarput, oqaloqatigiinnerput naggaserlugu Arnaaraq Høegh-Olsen taama naggasiivoq.
