Assammik arsartartut nutaartaqaaluttut, periuserli taamaaginnartoq
Kalaallit Danmarkimi assammik arsartartut piukkunnaatillit Fredericiami sapaatiummat ualikkut katersuupput.
Assammik arsartartut sungiusaqatigiilertigatik paasissutissarpassuarnik tunineqarput.
Foto: Knud Fl. Larsen
Timersoqatigiiffiit Assammik Arsartartut Kattuffiata (TAAK) kalaallit Danmarkimi ulluinnarsiutigalugu assammik
arsartartunik piukkunnaatilinnik nuannarineqartaqisumik 2025/2026-mi aamma katersuutsitsiniarluni
siorna pingasoriarluni assinganik aaqqissuussereernermini neriorsuutigaa.
Neriorsuutinik eqquutsitsinissaq soorunami pingaaruteqarmat, kalaallit niviarsiaqqat
nukappiaqqallu U15-it aamma U17-it 23-t Fredericiami Middelfart Sparekasse
Arenami sapaatiummat ualikkut katersuupput. Katersuunnermi peqataasut amerlanerpaartaat
Danmarkimiittuupput.
Taakkunannga
ilarpassui efterskolertuummata, sungiusaqatigiissitsinermi peqataasut nutaartaqartuaannarput.
Sungiusaqatigiissitseriaaseq
taamaaginnarpoq, siornami katersortitsinermi sungiusaasut Kathrine Mikkelsen aamma
Rasmus Larsen målmandinullu sungiusaasoq Bent Møller ukioq manna katersortitsinermi
aamma peqataammata.
Arlalinnik pissuteqartoq
Timersoqatigiiffiit
Assammik Arsartartut Katuffiat inuusuttunik assammik arsartartunik sungiusaalluni
katersortitsisarnerminut soorunami arlalinnik pissuteqarpoq.
Tassami
peqataasut ataatsimoornermik misiginissaat pineqarpoq. Aamma angerlarsimaffimminniit
qaammatini arlalinni ungasissumiinnerminni, ingammik ukiuunerani, imaannaanngitsorsiorpallaaqqunagit
katersuunnissamik aamma periarfissaqartinnissaat. Taamatuttaaq qilanaarutissaqartuarnissaat
minnerunngitsumillu inuusuttoqqatiminnik nunatsinneersunik assammik arsarluni
sungiusaqateqarlutik katersuunnerminnik tulluusimaaruteqarnissaat aamma
pineqarput. Assammimmi arsarneq amerlanerpaartaasa soqutigisarilluinnarpaat.
Ikinngutitaartornissaat soorunami aamma pingaartinneqarpoq. Ullormilumi
taamaattumi eqitaartut amerlasaqaat.
Nalunartoqaqaarlu: Imaasinnaavormi peqataasut ilai ima pikkoritsigilersimassasut , allaat nunani allani unammisartunut
ilanngunnissamut periarfissaqalersinnaallutik.
Ukiup
sinneranut pilersaarutit
Oktobarimi
decembarimilu katersuuteqqinnissaat pilersaarutaavoq.
