Nunatsinni
arsaannermi pissartanngorniunneq naammassineqaqqammerpoq. Pisorli malunnaatilik
ersarippoq: Arsaanneq kisimi pineqarani ataqatigiinneq pineqarpoq. Takummaaneq.
Nunap avannaanit kujammut ataqatigiinneranut tunngasoq.
Timersortartut
ataqqinaat kuultilu pillugit unammersuaraluartut isiginnaartut
qaqqajunnamiittut erinarsorlutillu, nilliallutik kaammattuillutik illersuipput.
Pissartanngorniunneq pisarnertut inunnut nuannaarutaavoq, timersornerullu
inuiaqatigiinnut uagutsitut ittunut qanoq iluaqutaasinnaaneranik
eqqaasitsissutaalluni.
Nunatsinni
arsaannermi pissartanngorniunneq naammassineqaqqammerpoq. Pisorli malunnaatilik
ersarippoq: Arsaanneq kisimi pineqarani ataqatigiinneq pineqarpoq. Takummaaneq.
Nunap avannaanit kujammut ataqatigiinneranut tunngasoq.
Timersortartut
ataqqinaat kuultilu pillugit unammersuaraluartut isiginnaartut
qaqqajunnamiittut erinarsorlutillu, nilliallutik kaammattuillutik illersuipput.
Pissartanngorniunneq pisarnertut inunnut nuannaarutaavoq, timersornerullu
inuiaqatigiinnut uagutsitut ittunut qanoq iluaqutaasinnaaneranik
eqqaasitsissutaalluni.
Ukioq manna
unammiuaarneq Nuummi ingerlanneqarpoq, tassani iligiiaat arfineq-pingasut
Kalaallit Nunaannit tamarmeersut peqataapput. Ukioq manna peqataapput
tassaapput Nuummeersut B-67, IT-79, FC Nuuk aamma FC Tugto, kiisalu
Qaqortormiut K-33, Paamiormiut N-45, Aasiammiut T-41 aamma Qeqertarsuarmit
G-44. Kuultinnannissaq anguniarlugu tamarmik unammipput, unamminerillu tamarmik
arsaannermik nuannarisaqarnerat ataqatigiinnerallu Kalaallit Nunaannilu
isikkamik arsaannerup ilisarnaataa erserpoq.
Qaqqajunnaq
erfalasunik misigissutsinillu ulikkaartoq
Ullormi
ammaanersiorfimmiit inuit qanittumiit ungasissumiillu takkussuupput. Nuummilu
qaqqap sivingarnani isiginnaartarfittut atorneqartumi inuppassuaqarpoq.
Erfalasut erfalapput, nipiliortitsisoqartarpoq, isertitsinerillu tamarmik
nuannaarutigineqartarput.
Pissartanngorniutivinnermi qilaammik nipiliortitsisoqarpoq, illersuisullu akornanni misigisaq arajutsisassaanani.
Assi: Henriette Dohm
- Kalaallit
Nunaanni unamminerit annerpaartaaripajaarpaat, angut isiginnaartoq
illersuinerminik iggiarlulersimasoq kaffisuutigaluni oqarpoq.
Nunatsinni
pissartanngorniunnerit isiginnaartorpassuarnut timersornerinnaanngilaq –
ileqquuvoq. Sapaatip akunnera ikinngutitoqqanik takummaaffiusoq, nutaanik
ilisarisimasaqalerfiusoq, ataatsimoornerlu illoqarfiit pingaarnersaanni Nuummi
qaqutigut misigineqartartoq. Naapitsineq takoqqinnerit ullut tamaasa pisarput,
unamminerlu naammassigaangat unnuap tungaanut oqaloqatigiinnerit
illaqatigiinnerillu pisarput. Qaqqat portusuut alannguanni, nunami
alutornartumi qaamanerup pinngortitallu naapeqatigiiffianni pissartanngorniunnerit
inuppassuarnut sooq taama pingaaruteqartiginerat paasiuminarpoq. Arsaattartut
22-innaat pineqanngillat – Kalaallit Nunaat tamarmi ataatsimoorpoq,
unamminerillu tamarmik ataatsimoortuunitsinnik eqqaasitsissutaapput.
Isiginnaariat perlilertut unamminerup unikkallarnerani seqinnariup ataani illaqatigiillutillu hotdogsituupput.
Assi: Henriette Dohm
Arsaaffiup
silataa inoqaqaaq. Unamminerup unikkallarnerani Inussiviup matuata sungaartup
saavani, pisiniarfittut atorneqartumi, utaqqisut tunuleriiaapput. Franskit
hotdogsit, parisertoastit, sikut kaagillu piumaneqaqalutik tuniniarneqarput.
Meeqqat arsaaffimmi namminneq arsarput, nittartakkatigullu
attaveqaqatigiittarfinni assit, videollu ikkunneqartut oqaaseqartarfiini
illoqarfimmiut illersuisuisa akornanni qinngasaarilaakujunnerit takussaapput.
- Arsaattut
isiginnaariarniarlugit takkuttoqartarpoq, isiginnaartulli akornanni misigisaq
pillugu tamaaniittoqartarluni, semifinalimi illersuisoq arnaq Qeqertarsuarmiut
qalipaataanik aappaluttumik qaqortumik atisaqartoq oqarpoq.
Nuuk
illoqarfittut unammiffiusussatut aaqqissuussiffiunerani Kalaallit Nunaata
sinneranit naapiffiuvoq. Arsaannermut, ataatsimoornermut pikialaarfittullu
qitiulluinnarluni.
Ajugaaneq
isertitaniinnaq pinngikkaangat
Arsaattartut
minutsini 90-ini unammisarput. Arsaattartut pikkorinnerpaat sukataartarlutik.
Isertitsiffigineqaraanni ugguarneq takussaasarpoq, isertitsigaannilu nuannaartoqartarluni.
Arsaq naggammik isimminneqareeraangat, pokalilu kivinneqareeraangat suna
siunertaasarnersoq takuneqarsinnaavoq: NP-mi iligiit kikkut ajugaanersut
pineqaannanngilaq – ataatsimoornermilli misigisimaneq arsaattartut
isiginnaartartullu akornanni pilersartoq pineqarpoq.
- Nunami
angeqisumi siammarsimavugut, maanili katersuuttarpugut ataatsimoorlutalu, arnaq
utoqqasaaq ukiut arfineq-marluk matuma siorna B-67-ip Nuummi
pissartanngorniunnerani kingullermi qaqqap sivingarnani aamma isiginnaaqataasoq
oqarpoq.
Ukioq manna
pissartanngorniunneq naammassimmat amerlasuujulluta unamminerit sakkortuut,
misigisat killitsinnartut ataatsimoornerillu nuannersut eqqaamavagut.
Timersoqatigiit
B-67 ajugaapput, ataatsimoornerli angusaavoq nuannernerpaaq. Illersuisoqarpoq,
eqitaartoqarlunilu erinarsoqatigiittoqarpoq – immaqalu pingaarnerpaamik:
Kalaallit Nunaat ataatsimoortinneqarpoq, ungasissuseq apeqqutaatinnagu
ataatsimoorneq, unamminerit tamarmik ataatsimoorfitsinnut ersiutaasarput:
Timersornerup suminngaanneerneq apeqqutaatinnagu
ataqatigiinnerulersitsisarnera.
