UNNIA
Atlantikup avannaani assammik arsartartut kattuffii nutaamik isumaqatigiissusiortut
Kalaallit Nunaanni, Islandimi Savalimmiunilu assammik arsartartut kattuffiineersut Reykjavikimi EM-imut anngunniunnermi oktobarip 15-ani suleqatigiinnissamik isumaqatigiissut atsiorpaat.
Assi: TAAK - Kalaallit Nunarput pillugu
Assammik arsartartut kattuffii pingasut - Timersoqatigiiffiit Assammik Arsartartut Kattuffiat (TAAK), Islandimi assammik arsartartut kattuffiat (HSÍ) aamma Savalimmiuni assammik arsartartut kattuffiat (HSF) - Atlantikup avannaani assammik arsarneq nukittorsarniarlugu ataatsimoorlutik isumaqatigiissummik atsioqatigiipput.
Timersoqatigiiffiit Assammik Arsartartut Kattuffianit (TAAK) tusagassiuutitigut nalunaarummi allapput. Kattuffiit pingasut nunarsuatsinni pissartanngorniuunnissanut peqataasarput, tamarmillu erfalasortik nassarlugu nunartik sinnerlugu peqataasarnertik ilisarnaatigaat.
Islandimiut Savalimmiormiullu arnartaasa Reykjavikimi EM-imut pingasunngornermi oktobarip 15-ianni anngunniunneranni muminnermi atsioqatigiittoqarpoq.
Atsioqatigiinneq toqqaannartumik aallakaatinneqartoq kultureqarnermut naalakkersuisumit Nivi Olsenimit ilaatigut peqataaffigineqarpoq.
Arnat nunanut allanut Kalaallit Nunaata unammisartui Islandimut qaaqqusaanikuupput, tassanilu Islandimiut arnartai nunanut allanut unammisartut U20-t marloriarlutik unammissallugit.
Ataatsimoorluni katerittarnerit, sungiusaasut dommerillu piginnaasatigut avitseqatigiittarnissaat, piukkunnarsinnaasunik ujaasinerit pitsanngorsarlugit nunarsuarlu tamakkerlugu assammik arsarnerni peqataasarnissanut ataqatigiissaarisarnissat ilaatigut suleqatigiinnermi nutaami ukkatarineqassapput.
Isumaqatigiissut ukiuni marlunni atuutissaaq sivitsoqqinneqarsinnaallunilu. Suliniut qulakkeerniarlugu aningaasaqarnerup isumagineqarnissaanik suliaqartussanik pilersitsinissaq tullinnguuppoq.
