B-67-ip pissartanngorniunneq Nuummi aallartikkaa

Nuummi silami arsaattarfissuaq qaqqap sivingarnata killinganiittoq allaaqqissuutillugu arajutsisassaanngivippoq. Isiginnaarianut issiavissaniittoqaavinngilaq, timersoqatigiiffiilli assigiinngitsut arfineq-pingasut angutitaasa isikkamik arsaarttartui GM-imik siornatigut taasakkamik Nunatsinni Pissartanngorniutileriarpata ulikkaartassagunavipput.

Nunatsinni Pissartanngorniuteqataasussani arfineq-pingasuusuni iligiit B-67-imeersut siorna aamma pissartanngortuusut ukioq manna aaqqissuussisuussapput. Taakku pissartanngorniuteqataalertinnatik naggammik sungiusaleruttortut najuuppugut, pissangaqisullu malunnarpoq. B-67-imeersut saniatigut pissartanngorniuteqataasussat allat ukunaneerput: IT-79, FC Nuuk aamma FC Tugto – taakku tamarmik Nuummeersuuupput – taavalu Qaqortumi K-33-imeersut, Paamiuni N-45-imeersut, Aasianni T-41-meersut Qeqertarsuarmilu G-44-imeersut. Tassa Kujataani, Kitaani Avannaanilu timersoqatigiiffiineersut pissartanngorniuteqataassapput.

- Kuultinnanniarpugut

Timersoqatigiiffiup pissartanngorniussamik aaqqissuussisussap, tassa B-67-ip siulittaasua Jimmy Holm Jensen, ilini sungiusartut isumalluarpaseqaluni malinnaaffigai. Taanna ilimi unamminissaannut NP-imillu aaqqissuussinissaminnut neriuuteqarluarpoq.

- Anguniagarput ersarilluinnarpoq: Tassa namminerisamik arsaattarfitsinni pissartanngorniunnermi kuultimik ujaminnassasugut, Jimmy Holm Jensen qungujuutigaluni pingaakujunniarpalaarnaveersaarlunili nipikitsumik oqarpoq.

Pissartanngorniuteqataasussat qiimarrapput, sungiusaasortaartillu, Oscar Scott Carlip, nutaamik sungiusaariaaseqarneranut malugusorrappaseqalutik. Oscar sungiusaasuunermi saniatigut tusagassiorfimmi Sermiatsiami assiliisartuulluni tusagassiortuuvoq.

- Oscarip sungiusartakkami siuariaateqarfigisinnaasaannik nutaamik sungiusaariaaseqarfiginerisigut nukissanik nutaanik tunioralaavissorpai. Sungiusaasuuffigisaanit tamanna aamma tusartarpara, Jimmy Holm Jensen oqarpoq Oscarilu sungiusakkami naalaaqqissaarlutik malinnaaqqissaarniarsarisut qanoq iliornissaannik nillillattaaleruttornerani isumalluarpasilluni qissimillugu.

Unammillertaalluartartut peqataasussaannginnerat ugguutigigaa

Siulittaasoq pissartanngorniunnissamut qilanaartorujussuusoq qularutissaanngilaq, unammillertaalluartartulli Ilulissaneersuusut ukioq manna pissartanngorniuteqataasussaannginnerat ugguutigeqigaa malunnarpoq.

- N-48-meersut ukioq manna peqataasussaannginnerat uggornaqaaq. Taakkualumi unamminerni sakkortuuni pingaarutilinnilu akersuutilaavissortarpugut, ujariatsinassaqaallu, Jimmy Holm Jensen ilumoorsaarluni aliannerpasingajalaarlunilu oqarpoq.

nunatsinni pissartanngorniunnissaq Unammillertaalluartartuni pikkorinnnersanut ilaasut peqataasussaannginnerat pissutaalluni apeqquserneqarpoq, nunatsinnimi nunap immikkoortuinit allaneersut ukioq manna peqataasussat Kitaaneersuninngarnit ikinnerumaarmata. Taamaakkaluartoq tassa nunatsinni pissartanngorniunnertut taanissaanut inatsitigut tunngavissaqartoq, B-67-p siulittaasuata erseqqissaatigaa:

- Ukioq manna kissaatigisamit peqataasussakinnerunera soorunami uggornaqaaq, isikkamilli arsaannermik pissartanngorniunnertut suli taaneqarsinnaasoq qularnanngilluinnarpoq, Jimmy Holm Jensen oqarpoq.

Nunanit tamalaaneersut soqutiginnileraluttuinnartut

Ukioq manna peqataanikinnerusoqartussaagaluartoq, nunani tamalaani tusagassiorfinneersunit soqutiginninneq aatsaat taama annertutigaaq, tusagassiortunimmi soorlu Tuluit Nunaanneersunit, Italiameersunit, Sverigemeersunit Spaniamilu aviisit ilaanneersumit tassa Marcameersumit najuuttoqassammat.

- Nunanit tamalaaneersunit aatsaat taama najuuttoqartigisussaanera pissutaalluni ukioq manna pisarnermit pissanganarnerusussaassaaq. Tamatuma nunatsinni isikkamik arsaattartut immikkorluinnaq ittuunerannik ersersitsilluinnarpoq, taamaammallu tamatuma takutinnissaanut qilanaarpugut, Jimmy Holm Jensen oqarpoq.

Nunanit tamalaaneersut nunatsinni ukioq manna pissartanngorniunnissamut soqutiginninnerunerat nunatta CONCACAF-imut, tassa Amerika Avannerlermi, Amerika Qiterlermi Caribiamilu isikkamik arsaattartut kattuffiannut ilaasortanngornissamut itigartinneqarneranik pissuteqarpoq, nunarpullu tamatumani unamminartorsioraluaqisoq tamanna kalaallit isikkamik arsaattartunut soqutiginnileraluttuinnartoqarneranik ersersitsivoq.

Seqinnarissumi isumalluarrappaseqisut

B-67-ikkunni siukkaq, Ari Hermann, namminerisamik arsaattarfimmi pissartanngorniunnermi kiaterisartakkaminnik tungujortumik qaqortumillu qalipaatilimmik B-67-llu ilisarnaataanik assiliartalimmik atortoq arajutsisassaanngilaq. Taanna arsaattartoqatinilu seqinnarissumi isumalluarrappaseqalutik assilitinnissaminnut qeqqipput. Pissarmaarrappasillutillu tulluusimaarrappasipput. Ari Hermann nunatsinni qulingiluassaanik pissartanngorniuteqataassaaq, peqataanissaminullu piumassuseqaqaluni.

- Holdeqatigiiusugut qimarrateqaagut, aallartinnissatsinnullu qilanaarralluta –ingammik namminerisamik arsaattarfitsinni ukioq manna pissartanngorniuttussaanerput eqqarsaatigalugu, taanna oqarpoq.

Pissartanngortuussangatinneqarnertik ingallutik pissangassutigaat – tamannali Ari Hermannip pitsaaqutitut isigiinnarpaa.

- Ajugaassangatinneqarnerpummi torraavoq. Soorunami pissanganerussutigilaarpara, uannulli piumassuseqarnerulissutaaginnarpoq. Unamminerni tamatigut akersuukkumaarluta periusissavut atussavagut, taanna oqarpoq ilimilu ilaat isumalluarluni nillerpallattup assilitileruttornerani qungujuutigaluni qiviarlugu.

Pissartanngorniuteqataasussat seqinnareqisumi nuannapput, ataqatigeeqisullu ersarippoq.

- Ataqatiinneq. Ataqatigiissuaarpugut, Ari oqarpoq ilinilu assileqatigiartortinnagit erseqqissaatigalugu ataqatigiinneq taanna arsaannerminni arsaatinngikkaangamillumi pigisaritsik.

Pissartanngorniunniuttussat Nuummi silami arsaattarfissuarmut isiginnaariarneqarsinnaajumaarput, tassanilu ajugaaniutivinnissamut annguttut aggustip pingajuani unammissallutik. B-67-imeersut ataqatigiilluartuunermikkut kultinnanniuteqataanissartik anguniarpaat – Nuummiullu isikkamik arsaalluni pissartanngorniunnissamik sapaatip-akunneranik sivisussusilimmik aaqqissuussisuunissaminnut piareerlutik.