Biathlonertartut inuusuttut nunani allani sungiusartarlutillu unammisarput

Sisoraatinik ooqattaasartartut inuusuttut pingasut Norgemi Sverigemilu sungiusarluaqqammerput, kattuffiullu inuusuttut VM-ernissaannut qanittukkut pisussami peqataatikkusuppai.

Norgemiinneq Sverigemiinnerlu IBU-mit, nunarsuaq tamakkerlugu timersoqatigiit kattuffiannit, ikiorneqarnermik pivoq,

Assi: Kalaallit Nunaanni Biathlonertartut Kattuffiat

Morten Okkels Morten Okkels Tusagassiortoq

Saqqummersinneqarpoq 16. Februaari 2025 - 10:01

Annonse

Arnat ooqattaasartuni unammisartut tullii Norgemi Sverigemilu sungiusarluarput. Sasja Joelsen, Marika Magnussen aamma Nanna Møller sungiusaasunit, Ukaleq aamma Sondre Slettemarkip ulluinnarni ikiortaannik, siunnersorneqarput.

Timersortartut inuusuttut taakku pingasut 15-it 18-illu akornanni ukioqarput, sungiusariaqqanermilu qoorortuumik aallaasaarnermik piginnaaneri ineriartortinneqartut Kalaallit Nunaanni Biathlonertartut Kattuffiat allappoq. Nuummi luftgeværit atorlugit sungiusartarput.

VM-imut aqqutissiuussisoq

Taakkua pingasut aamma unamminerni peqataasarsimapput angusarissaarlutik. 15-inik ukiulik Nanna Møller Norgemi pissartanngorniunnermi normu 13-iuvoq, arpannermilu angusarissaarnerpaat ilagalugit.

Niviarsiaqqat taakkua sisoraatinik ooqattaasarnermi piumagunik qaffasissumik angusaqarsinaanerat Kalaallit Nunaanni Biathlonertartut Kattuffiat upperaa. Norgemi Sverigemiluunniit sisorarnermut ilinniarnertuunngorniarfimmiissinnaanerat aamma ilimagalugu.

Sungiusarnermi ilungersornerat aamma kinguneqarpoq, taakku pingasut tamarmik inuusuttut VM-ernissaannut februaarip naanerani pisussamut toqqarneqaramik, Kalaallit Nunaat sinnerlugu stafetimi unammeqataassapput.

Siullertut misilittakkat eqqarsaatigalugit siunissamilu isumassarsissutiginissaat pineqartoq peqatigiiffik naqissusiivoq.