Carsten Olsen: Sapiitsuusariaqarpugut
TAAK-ip, Timersoqatigiit Assammik Arsartattut Kattuffiata siulittaasuata Carsten Olsenip ernermi Danmarkimi efterskolemi naggataarnersiorneranut atatillugu Jakob Larsen, februaarip aallaqqaataaniilli TAAK-imut assammik arsarnermi periusissiornermut siunnersortitut ilaasortaasoq, ataatsimeeqatigaa.
Knud Fl. Larsen
Taakku marluk Dansk Håndboldimi ataatsimeeqatigiipput, tassanilu Dansk Håndboldimi siulittaasoq Morten Stig Christensen aamma timersornermut pisortaq Morten Henriksen ineriartortitsinermut tunngasut assigiinngitsut pillugit oqaloqatigiissutigaat.
Ataatsimiinnermi Kalaallit Nunaanni assammik arsarneq pitsanngorsarniarneqarpoq, nunanut allanut unammisartunut klubbinilu ilaasortanut.
Parisimi OL-ip kingorna Dansk Håndbold peqatigalugu ilisimasanik avitseqatigiittarneq kalaallinillu sungiusaasunik ilinniartitsineq pillugit isumaqatigiissuteqartoqarnissaa anguniarneqarpoq.
Inernerit nammineq takkunneq ajorput
- Unammillersinnaassuseqartariaqarpugut, tamannalu nammineq takkunneq ajorpoq, Carsten Olsen Sermitsiamit apersorneqarami oqarpoq.
- Nunatut ataatsimoorluta ajunngitsumik iliuuseqarsinnaasariaqarpugut, soorlu ukiut 20-t sinnerlugit matuma siorna angutit nunanut allanut unammisartut VM-imi peqataammata taamaaliortugut, aamma arnat nunanut allanut unammisartut kingullermik Norgemi Danmarkimilu VM-imi taamaaliorput.
- Nuummi assammik arsarluni unamminermi isiginnaartut nunatsinnut qiimmassaasut takullugit inuiaassutsimik pingaartitsinermik nuannersumik taasarpara.
- Nuannaarutissaqarneq tulluusimaarutissaqarnerlu nuanneqaaq, taamaattumik oqarpunga pitsaanerusumik iliornissamut sapiissuseqartariaqartugut, Carsten Olsen oqarpoq.
Suleqatigiinnerput kinguneqarluareerpoq
TAAK-imik Jakob Larsenimillu suleqateqarnitta qaammatialuinnaat matuma siorna aallartinneranili angusaqarluarpugut. Jakob Larsenip assammik arsartartut pitsaanerpaat akornanni inuunermini ilisimasaqarluarnini atorluartarpaa.
Ukiuni 15-ini kingullerni GOG-p angutitaanut sungiusaasuusimavoq, 2017-imiillu Nykøbing Falster Håndboldklubbip arnataasa Danmarkimi pissartanngorniunnerini kingullerni sølvinnassimasunut sungiusaasuulluni.
- Nunanut allanut unammisartunut sungiusaasut assigiinngitsut ataatsimeeqatigineqarput, assammik arsarnermi sungiusaanerup qanoq pitsanngorsarsinnaanera pillugu isumaqatigiissuteqartoqarluni, Carsten Olsen nangippoq.
- Jakob Larsenimik isumaqatigiissut nunanut allanut unammisartunut sungiusaasut piginnaanngorsarnissaannut tunngassuteqarpoq.
Anguniagaqarneq aningaasaqarnerlu ataqatigiipput
Soorunami Kalaallit Nunaanni assammik arsartarneq siuarsassagaanni aningaasartaqassaaq, aningaasalli atorluarneqarsinnaapput. Carsten Olsen nalorninngilaq:
- Kalaallit Nunaanni isumaginninnermut aningaasartuutit amerlapput. Assersuutigalugu meeqqat angerlarsimaffiup avataanut inissinneqartut amerlavallaarput. Timersorneq, tassunga ilanngullugu assammik arsartarneq, inuppassuit inuunerannik imaqarnerulersitsisinnaagaluarpat, aningaasat millionillit atorluarneqarsinnaagaluarput. Timersorneq aningaasaliiffiginerugaanni aningaasat sipaarneqarsinnaagaluarput.
- Iliuuseqanngikkutta unammillertitsinnut ajorsarlutalu VM-imut anngunniunnissamut periarfissaarulluinnassaagut.
VM-imi peqataaneq imaaliallaannaq anguneqarsinnaanngilaq. Arsaattarfimmi arsaattarfiullu avataani sulingaatsiartoqartariaqarpoq.
Ukiuni kingullerni TAAK-ip nunanut allanut unammisartut sisamat — angutit arnallu inersimasut inuusuttullu marluk — suleqatigai.
- Tamanna siulersuisuniit isiginiarneqarsimavoq. Aningaasat peqatigiiffiullu maanna atukkatta taama amerlatigisunik nunanut allanut unammisartoqarsinnaaneranut piviusorsiornerunngillat.
- Akisoorujussuuvoq. Soorunami pingaarnersiuineq annernartumik kinguneqassaaq, ajoraluartumillu pisariaqarluinnarpoq, Erfalasorpullu VM-imi takuteqqinneqassappat maanna iliuuseqartoqartariaqarpoq, Carsten Olsen naggasiivoq.
