GSS Håndbold USA-mi klub-VM-imut anngunniulluni unammivoq – sungiusaasoqaratilli unammeqataasariaqarsimapput

Nuka Bilo Heilmann, Nuummi GSS-imeersoq, naapertorlugu unammisartut USA-mut sungiusaasoqaratik aallarput, angalanissamut aningaasa naammanngimmata. Unammisartut katillugit 13-it peqataapput – pisortatigoortumik sungiusaasoqaratik. Unammiuaarnernili peqataanissamut piumasaqaat ersarilluinnarpoq: unammisartut sungiusaasoqassapput.

– Sungiusaasumik ujarlertilluta qanoq ilioriusissaaruttutut misigivugut, Nuka Bilo Heilmann Sermitsiamut oqaluttuarpoq.

Unamminerulli aallartinnissaa nalunaaquttap-akunneri pingasut sioqqullugu sungiusaasussamik Amerikamiumik unamminerni sungiusaasuusinnaasumik nassaarput.

GSS klubbini nunarsuarmi pissartanngorniunnissamut anngunniunnermi peqataaqqammerpoq. Unammersuarneq Las Vegasimi ingerlanneqarpoq. GSS, angutit assammik arsarlutik Nunatsinni pissartaapput, nunatsinni pissartanngoqqikkamik qulakkeersimavaat anngunniunnernut peqataasinnaanertik.

Finalimut annguttut

Unammiuaarnissap tungaanut klubbi aningaasanik katersisimavoq aningaasaliisussarsiorsimallunilu, Las Vegasimut angalanissamut najugaqarnermullu atugassanik, aningaasalli sungiusaasup ilaanissaanut naammassimanngillat.

Unammiuaarnermi unammisartut ilaat marluk annerput, unamminerullu sinnerani peqataaqqissinnaanngimmata, unammiuaarneq tamakkerlugu aqqanillit peqataaffigaat.

Taamaakkaluartoq GSS pissartanngorniutivinnermut annguppoq, California Eaglesimulli unammigamik 37-31-mik ajorsarlutik. California Eagles maanna klubbit nunarsuarmi pissartanngorniunnissaannut, septembarip naanerani Egyptenimi pisussamut, anngussinnaanngorput.

GSS unammiuaarnermi normu 2-ngorput.

Taamaakkaluartorli tunniutiinnanngillat:

– Unnugu (tallimanngorneq, aaqq.) angerlamut aallassaagut, tullianilu misileeqqissaagut. Aningaasaliisunut tamanut qujavugut - taakkoqanngitsuuppammi tamaanngarujussuaq killissimanavianngikkaluarpugut, Nuka Bilo Heilmann naggasiivoq.