Ilulissani volleyballimi Kalaallit Nunaanni pissartanngortut

Angutit GM-ernerat: 

Iluliarmiut I-69-kkut GSS-llu Nuummeersut finalerneranni kikkut kuultinnassanersut eqqoriaruminaappoq. Finalertut GM-imi unamminerminni tamarmik ataasiarlutik ajugaapput, taamaammallu kikkut nukissaqarnerpaanerat unamminermi aalajangiisuussaaq – taamatullu aamma GSS-p tallimariarluni malittuinnarnik kuultinnattarnerinik akiniaanissaq. 

I-69 unammineq tamaat allanngorartumik unammivoq, taamaaliornerisalu Nuummit tikeraat pakatsisippaat. Tikeraat arsartuini pikkorinnerpaaq, Akutaaneq Kreutzmann, sumit tamanit arsamik smasherisaqattaarpoq.

Iluliarmiulli Thomas Geislerertaqarput, taannalu 3-meterimit qassutaasanillu piginnaaneqarluartumit Kenny Petersenimit ikiorluarneqarluni smasherisaqattaarpoq, taamaalillunilu GSS-p assiilluaqattaarnerat qaangertarlugu. Taanna siunissami takusassagipput ilimanarpoq.

Unammineq tamakkerlugu finalertut imminnut angusaapput, kukkusoqarnissaanullu akissaqartoqanngilaq. 2. sætip kingorna 1-1-eqqapput, timersortarfissuarlu nippaavissimavoq.

3. aamma 4. sætimi I-69-ermiut unammilluavipput, tassanilu misilittagaqarluartut, soorlu Niels Jørgen Jensen Nukannguaq Ostermann pingaarutilimmik inissisimapput. Naggataagullu Ilulissat timersortarfissuani isiginnaartut nuannaarteqalugit I-69-p kuulti qularnaatsumik isumannaarpaa.

Angutit bronzenanniunneranni AVI-mi kinguaariit nutaat ajugaapput, taakkulu piginnaasallit sineriammeersut ajugaaffigaat. Piginnaasallit holdinut unammersuarneq tamakkerlugu akiuulluavittarput.

Arnat GM-ernerat: 

Pissartaanerminnit illersuisut KTVI Kangaamiuneersut GSS-lu finalimi naapipput, finalernissallu tungaanut KTVI ajorsartinneqanngilaq. GSS-illi unammineq tamakkerlugu piumassuseqarluarnertik takutippaat, inissisimaffinnilu tamani akiuulluarlutik. KTVI ataqatigiinnginnerusumik unammivoq, taamaalillunilu GSS-ermiunit unammilluaqisunit 3-1mik ajorsartinneqarput.

Ilulissaneersut I-69-p arnartai AVI Maniitsumeersumut ajugaallutik bronzennapput. Iluliarmiut arnartaanni misilittagaqarluartut inuusuttuaqqallu akulerussimapput. Taakkulu ukiuni tullerni pissartanngorniunnissani maluginiartarumaarpagut.