Issittumi ilisimatooq anorimut qamuserluni sikukkut 1.500 kilometerit sinnerlugit ikaarluni angalaniarpoq

Upernavimmi innuttaasut ullut 30-mit missaat qaangiuppata ilisimasassarsiortuniit tikeraarneqassapput, taakkumi nunatta kujataaniit avannaanut anorimut qamuserlunik ingerlaassapput.

Issittumi ilisimasassarsiorumatooq Ramón Larramendi ukiorpassuarni misilittagaqartoq ilisimasassarsiornermi siuttuuvoq, taanna ilanilu 1.500 kilometerisut isorartutigisumut anori seqinerlu atorlugit ingerlaassapput.

Anorimut qamutit 20 miiterisut takitigisut

Ilisimasassarsiortut anorimut qamutit 20 miiterisut takitigisut, 3 miiterisullu silitsigisut 3 tonsinillu useqartut atorlugit angalapput.

Taakku angallataat seqerngup nukinganik qullartaasiamillu anorimut atortoqarlutik angalasinnaapput. Taakkua atortorissaarutit atorlugit tiimimut 50 kilometerimut sukkassuseqarlutik ingerlaarsinnaapput

Ilisimatuut arfineq-pingasut angalanertik maajip ulluisa aappaanni aallartippaat, tassani nunatta kujataaniit Qaleralimmiit aallarput, Upernavillu ulluni 30-ini tikinniartussaassallugu.

Issittumi ilisimatooq ilisimaneqarluartoq

Ramón Larramendi Madridimi 1965-imi inunngortoq issittumi ilisimatuutut misilittagaqarluartutut ilisimaneqarpoq.

Taassuma issittumi 40.000 kilomerisut isorartutigisumit ikinnerunngitsut angalasimavai, Circumpolar Ekspeditionimilu 1990-imi ukiuni pingasuni ingerlanneqartumi siuttuusimalluni.

Taanna 25-inik ukioqarluni issittumi angalaqqaarpoq, issittumi sikuijuitsumilu kujallermi angalasimalluni. Maanna angalanera tulleq angisooq, tassa Qaleralimmiit Upernavimmut pisussanngorpoq.

Ilisimasassarsiornerat uani atuarneqarsinnaavoq: https://windsled.org/inuit-windsled/