Johannes Groth: Bronzenannerput nuannaarutigaarput
Nunarsuaq tamakkerlugu pissartanngorniunnissamut Mexico Citymi anngunniutereerlutik Nuummut angerlaqqipput. Nunanut allanut assammik arsarluni unammisartunut sungiusaasup unammisartut siunissaat eqqarsaatigilereerpaa.
Nunanut allanut unammisartunut sungiusaasoq Johannes Groth
Leiff Josefsen
Puljemi kingullermi USA-mut ajorsarnerup kingorna holdit bronzennanniunnissamut piareersarnerminni nukippassuit piffissallu annersaat atorsimagaat, Johannes Groth oqaluttuarpoq.
- Soorunami USA-mut ajorsaratta pakatsivugut. Pissartanngorniunnissamummi neriuuteqarsimagaluarpugut. Holdit pungasuuvugut: Mexico, USA Kalaallit Nunaallu, pointinik assigiinnik naammassisut. Mexico finalimut annguppoq, uagutsinniik måleqarnerugamik, Johannes Groth oqaluttuarpoq.
- Qujanartumik bronzennanniunnissamut eqqarsartaatsikkut piareersimasimavugut, qujanartumillu 29-24-imik ajugaalluta bronzennalluta, taava susaarata angerlarpugut.
Nalilersuipallanneq
Johannes Groth nalorninngilaq. Cuba ajugaasuuvoq eqqortoq. Cuba nukittuunik arlalinnik unammisartoqarluni peqataavpq, tassani Europami inuussutissarsiutigalugu ulluinnarni unammisartuupput. Cuba unamminermi ajugaaffigineqarani naammassivoq.
- Uaguuvorli Cubamut ajorsarnikinnerpaat. "Taamaallaat" målinik qulingiluaannarnik nikingavugut, Mexico Citymilu unammineq nalilersupallassimanerarlugu nangilluni:
- Unammineq tamaat eqqarsaatigalugu periarfissarpassuaqarpugut. Soorunami unamminerit ikittuinnaat peqataaffigisarpavut, unammisartullu målmandillu pikkorissut unammigaangatsigit isertitsivallaartanngilagut.
Siunissaq
- Siunissaq isigalugu ajunngitsoq isumaqarpunga. Mexicomi siullerpaamik peqataasut sisamat peqataammata siunissaq qilanaarilerpara. taakkumi misilittagaqalerput. Unamminerni piumaartussani inuusuttut arlallit peqataatinniartussaavagut.
- Mexicomiit timmisartumut ilaalluta U18-ni nunani allanut unammisartunut sungiusaasoq Angutimmarik Kretzmann oqaloqatigaara, isumaqatigiippugullu klubbini assigiinngitsuni unammisartuni piginnaanilinnik peqartoq, taamaammat suliassaqarpoq, Johannes Groth naggasiilluni oqaluttuarpoq.
Ikastimi inuusuttunik assammik arsartartunik suliniuteqarpoq, taakku Kalaallit Nunaanniit Danmarkimukarlutik assammik arsarnermik arsariaatigalutik atuariartorput. Ukiumilu atuarfiusumi inuit pingasut naammassilerput. Unammiffissamilu aamma immaqa marluk pingasut takkuttussaassallutik.
