Jørna-Marie Larsen, ASP aamma Nuka Martin Lynge, SSP Olympiadissapput

Nunatsinni sisorartartut kattuffiat tusagassiuutitigut nalunaaruteqarluni ilisimatitsivoq Kalaallit Nunaat ujakkaartartunik marlunnik peqataatitsilersoq innarluutillit ukiuunerani unammersuarnissaannut. 

Special Olympics Winter Games 2025 (SOWWG), Danskit naalagaaffiat sinnerlugu aallartitanut peqataassapput ujakkaartartut unammisartut, Jørna-Marie Larsen, ASP Aasiaat aamma Nuka Martin Lynge, SSP Sisimiut.

Taakku sungiusaasutillu Italialiami Torinoliassapput, Pragelatomi Special Olympic Winter Games-imut peqataajartorlutik. Unammersuarnerit ingerlanneqassapput 7.–16. marts 2025.

Unammersuarnermi inupparujussuit 1.500-it missaat peqataassapput, nunanit tamalaanit 103-nit aggerfeqarlutik. 

SOWWG-mi unammissutit makku ingerlanneqassapput: Sisorarluni sangusaarneq, ujakkaarneq, sukuutserneq, natermi arsaararneq, sukuutserluni naatsumik sukkaniunneq, snowboard aammalu Sneskoqarluni oqilaniunneq.

Special Olympics tassaavoq nunarsuaq tamakkerlugu kattuffik, inuit ineriartornermikkut innarluutillit timersornerannik aaqqissuussisartoq. 

Island inissanik tunniussisuuvoq

Peqataatitsisinnaaneq piviusunngorsimavoq Island-ip ujakkaarnermi peqataanissamut inissaatitik marluk Kalaallit Nunaannut tunniukkusussimagamikkit. 

Toqqaannaq inissat nunatsinnut tunniussinnaannginnamikkit Danmarkimut tunniussimavaat. Taamaasilluni Kalaallit Nunaat peqataasinanngorluni, danskit unammersuariartussat aallartitat peqatigalugit. 

Pâviâraq Heilmann Sisorartartut Kattuffianni siulittaasoq imak oqaseqarpoq:

- Sisorartartut Kattuffiat sinnerlugu aaqqissuussamut taamak annertutigisumut peqataatitsisinnaagatta tulluusimaarutigaarput, angusaq annertoqaaq.

Marie Fleischer Ujakkaartartut Ataatsimiititaliaani siulittaasoq imak oqaaseqarpoq: - Ujakkaartartut marluk pikkorilluinnartut aammalu piumassuseqarluartut unammersuariartilerpagut. Nuannaartutigeqaarput peqataatitsinissarput aammalu malinnaaviginissaanut assut qilanaarlutalu pissangavugut.