Kalaallit Street Dancemi VM-imi peqataasut
Street dansemik qitittartut Eva Luna Egede aamma Mathilde Høy Thomsen Blackpoolimi Tuluit Nunaanniittumi nunarsuarmi pissartanngorniunnermi sapaatip-akunnerata naanerani peqataapput.
Assiliisoq: Mathilde Høy Thomsen aamma Eva Luna Egede Erfalasorput peqatigalugu.
Assiliisoq: Privat
Niviarsiaqqat marluk Danmarkimi pissartanngorniunnermi, Skandinaviami pissartanngorniunnermi ukioq mannalu Tysklandimi EM-imi ajugaaniutivinnermi ajugaasunut tulliullutik inissinnerminni VM-imut anngupput.
Nunarsuarmi pissartanngorniunneq unammiuaarneruvoq annertooq, qitittartut 4000-it sinnillit nunanit 40-nit amerlanerusuneersut peqataaffigisaat.
Kisimiilluni, marlukkaarluni holditullu qitittartut peqataasut saniatigut isiginnaartorpassuit, katillugit 8500-t missaanniittut, Blackpoolimi Winter Gardens Centerimut takkutissasut aaqqissuussisut naatsorsuutigaat.
Unamminerni aallarniutaasuni ingerlaqqinngitsut
Unamminerit aallarniutaasut taakkununnga naggataarfiupput. Naak pissartanngorniutivinnissanut peqataanissaq iluatsinngikkaluartoq unammersuarnermi taama annertutigisumi peqataaneq misigisaavoq puiunaatsoq, Eva Lunas arnaa Ivalu Egede Martinsen Blackpoolimiit uagutsinnut oqarpoq.
- Erfalasulerluni ingerlaaqatigiinnermi Eva Lunap Kalaallit Nunaat sinnerlugu Erfalasorput nittarsaappaa. Street Dancemi nunarsuarmi pissartanngorniunnermi Kalaallit Nunaat perngaammik peqataavoq.
Naak pissartanngorniutivinnissamut marluullutik anngutinngikkaluarlutik ujaminnannissamik periarfissaqarput. Qiteqatigisartakkatillu O.T. Coops peqatigalugu aamma unammissapput. Taakka maanna normu 3-mi inissisimagallarput. Eqimattatut qitittartut ullumi sapaammi pissartanngorniutivissapput. Niviarsiaqqat ukioqatigiiaani 11-12-ni ukiulinni qiteqatigiit aqqaniliupput.
Street Dance qiteriaatsinik assigiinngitsunik akuugaavoq, ilaatigut hip-hop-ertarnermik, tassani nipituumik nipilersuuserluni assigiinngitsunik aalariaaseqarneq naliliisartunit nalilersorneqartarput. Sukkaannaq pisarpoq. Qitinneq ataaseq 60-90 sekundinik sivisussuseqartarpoq.
Assammik arsarnermit nalunngisatsitut peqataasut ukiut marlukkaarlugit ukioqatigiianut immikkoortiterneqartarput. U6-iniit U18-inut.
Peqataaneq akisooq
Unamminerni taama annertutigisuni peqataaneq akikitsuinnaanngitsoq Ivalu Egede Martinsenip oqaloqatigiinnermi isertuutinngilaa. Angalanermut ineqarnermullu aningaasartuutit amerlipallattarput.
- Qujanartumik aningaasaliisoqarpoq ikiuuttunik. Assersuutigalugu niviarsiaqqat atisanik Inuit Quality Clothes of Greenlandimiit tunineqarput.
