Kujataani nukittuneqqusaanneq: Nivikka Joelsen ajugaanermini misigissuseqaqisoq
Kujataani Nukittuneqqusaanneq Narsami sapaatip akunnerata naanerani iluatsilluartumik ingerlanneqarpoq. Angutit arnallu anoq nukittutiginertik paasiniarlugu takutinniarlugulu unammeqataapput – ukioq mannalu 50 angullugit ukiulinnik peqataasoqarpoq.
Nivikka Joelsenip kivittaarinermi 130 kilo kivippaa.
Assi: Youtube / Georg Kiiu Olsen
Angutit arnallu Kujataani Nukittuneqqusaannermi nukitik piginnaasatillu takutippaat.
Unammineq aappassaanik Kujataani ingerlanneqarpoq. Aaqqissuisoq siulittaasorlu Qillaq Poulsen naapertorlugu kajumissuseqarluarpoq:
- Inuit nuannaarlutillu tunniusimapput. Narsamiittunut tamanut misigisatsialaavoq. Aamma inuit 3.000-init amerlanerusut Youtubemi malinnaallutik isiginnaarput, taanna oqarpoq.
Maluginiarneqartut ilagaat Nivikka Joelsen Qaqortumeersoq, arnani 81 kg-miit oqimaannerusuni ajugaasoq. Ajugaanermili saniatigut inuunermi pikkunartumik aqqusaagaqarsimavoq.
- Ernera siorna novembarimi annaavara, tamannalu misigissutsikkut assorujussuaq sakkortuvoq. Qaammatit marluk sungiusanngilanga, Nivikka Sermitsiamut oqaluttuarpoq.
Aliasukkaluarluni unammeqataaniarluni aalajangerami ajugaavoq:
- Tunniutiinnannginnera tulluusimaarutigaara.
Peqataanera isumassarsiorfigalugu arnat amerlanerusut unammineq aappaagu Qaqortumi ingerlanneqalerpat peqataajumaartut taassuma neriuutigaa.
Nivikka Joelsenip ataatami ukioq manna unamminermi peqataanera immikkut nuannaarutigaa.
- Siorna aamma ajugaavunga, taamanilu ataataga ajugaaguma aappaagussamut peqataaniarluni oqarnikuuvoq. Tamanna eqquutsippaa, ukioq mannalu peqataavoq – ajunngeqaaq.
