Maniitsumi timersoqatigiiffik: TAAK-p siulersuisui tatigiunnaarpavut

Assammik arsartartut peqatigiiffiat Kâgssagssuk Maniitsoq 1937-p assammik arsartartut kattuffiata siulersuisui siulittaasualu Carsten Olsen tatigiunnaarpaat.

- Siulittaasoq tatigiunnaarlugu nalunaarutigaarput, klubbi tusagassiuutinut nalunaaruteqarluni allappoq.

Kattuffiup aningaasaqarnerata ajorsiartuinnarnera tatiginnikkunnaarnermut pissutaasoq timersoqatigiiffik allappoq.

Juulip naanerani kattuffiup siulersuisuisa nalunaarutigaat nunanut allanut unammisartut ukiup sinnerani unitsinneqassasut, kattuffillu aningaasaateqanngimmat nunanut allanut unammisartunut sungiusaasut piffissami tamatumani akissarsiaqassanngitsut.

Arnat assammik arsartartut Norgemi 2023-mi VM-imut peqataanerat aningaasanik atuiffiungaatsiarsimasoq assammik arsartartut kattuffiata nassuiarpaa.

Nunanut allanut unammisartut sungiusarneqannginnerat unammilluarsinnaanermik naleqartartoq, tamannalu allatigut aningaasalersorneqarsinnaaneranik ujartuinikkut pinaveersaartinneqarsimasinnaagaluartoq Kâgssagssuk Maniitsoq 1937-meersoq isumaqarpoq.

Aallartitat ataatsimeersuarnissaat arlaleriarluni kinguartinneqartoq

Naatsorsuutit ajornartorsiutaanerata saniatigut aallartitat ataatsimiinnerat suli ingerlanneqarsimanngitsoq assammik arsartartut peqatigiiffiata aamma tikkuarpaa, kattuffiup malittarisassai naapertorlugit ukioq manna juunip 15-ianni pisussaagaluarpoq.

Aallartitat ataatsimeersuarnissamut qaaqqusissummik suli nassinneqanngillat imaluunniit qaqugu pinissaanik suli paasitinneqaratik.

- Naatsorsuutit patsisiullugit arlaleriarlugu kingutinneqartarpoq. Timersoqatigiiffik Kâgssagssuk naatsorsuutit kisimik oqaluuserisassaanngitsut isumaqarpoq. Ataatsimeersuarneq 15. juni sioqqullugu naammassineqarsinnaagaluarpoq

TAAK-p isornartorsiorneqarnera pillugu Carsten Olsen oqaaseqartinniarlugu Sermitsiap sulissutigaa.