Mike Keenip Qaanaamut qajartornini nangippaa
Mike Keen, tuluit igasuat, misigisassarsiortartoq qaannamik angalasartoq, Upernavimmiit Qaanaamut angalanini sivisooq ullumi nangippaa. Taanna Qaqortumit Qaanaamut qaammatit pingasut qaannamik angalaniarluni siorna apriilip 26-ani aallarpoq. Avannaanili sikuvallaarnera pissutigalugu siorna juulip qiteqqunnerani Upernavimmut apuukkami unippoq. Ullumikkullu tassa angalanini nangippaa, maannalu Qaanaamut ingerlaarpoq.
Mike Keen i havnen i Upernavik for at gøre sig klar til turen til Qaanaaq. Han tog afsted fredag den 26. juli ved klokken 13.00
Foto: Najannguaq Mathæussen
Mike Keen maanna aalajangersimaqqissaarluni siorna angalanini nangillugu ullumi tallimanngornermi qaannamik aallarpoq.
Siorna angalanera 3.000 kilometerisut isorartutigisussaagaluarpoq. Tassami Qaqortumiit Qaanaamut qaannamik ingerlaartussaagami. Nunattali avannaa sikoqarpallaanera peqqutaalluni angalanini Upernavimmi siorna naammassigallarpaa.
Ulluni 76-ini 2.200 kilometerisut isorartutigisoq ingerlavaa.
Tassa maanna Mike Keenip naammassinngisani naammassiniarlugu aallarpoq. Upernavimmiit Qaanaamut. Ullumikkut qaannani immamut ilivaa, Upernavimmullu 850 kilometerisut isorartutigisoq qaannamik ingerlaarfigisussanngorlugu.
- Kingullermik Upernavimmut killippunga, Qaanaamut ingerlaqqissinnaasimanngilanga sikoqarpallaanera peqqutaalluni, Mike Keen Sermitsiamut oqaluttuarpoq.
- Ingerlaqqilerpunga.
Sapaatip akunneri tallimat
Mike Keen kilometerit 850-it qaannamik ingerlaarfigissavai, neriuutigalugulu sapaatip akunneri tallimat qaangiuppata Qaanaamut apuussinnaassalluni. Silali apeqqutaavoq. Angalanermini kalaaliminiinnarnik nerisaqaqqissaaq.
Ulluni makkunani nannut takussaammata, Mike Keen aalajangerpoq nerisassani qaannamiitiinnarniarlugit, tupermi sinikkaangami tupermiitinnagit. Taamaaliornikkut nannumik naapitsinnginnissani neriuutigaa.
Mike Keenip angalanera nittartagaani malinnaaffigineqarsinnaavoq.
