NÛK Arnat futsalimi pissartanngoqqipput

Sapaatip-akunnerata siuliani Ilulissani arnat futsalimi pissartanngorniunnerat ingerlanneqarmat, Nuummit NÛK Arnat ajugaallutik pissartanngoqqissinnaasimapput.

Unammiuaarneq nuannersumik misigisaqarfigisimallugu, sungiusaasoq Ole Martinsen Sermitsiamut oqarpoq.

Sungiusaasuunerata nalaani NÛK-p pingajussaanik ajugaanerat kisiat pinnagu, aammali holdit arfineq-pingasorsuit peqataammata, inuusuttullu piginnaasaqarluartut amerlasuut Ilulissani takutitsilluarnerat pissutigalugu:

- Puljet marluk holdinik sisamanik peqataatitaqarput, ukioq mannalu akeqqavut ajunngeqaat, tassani pikkorissut inuusuttullu piginnaasaqarluartut holdinit allanit unammisarlutigit.

Neriulluarnartoq

- Soorunami aamma misilittagaqarluartunik unammisoqarpoq, siunissamili neriulluarnartoqarpoq, Ole Martinsen unammiuaarnerit kingorna oqarpoq.

Siorna unammiuaarnermi holdit tallimaannaat peqataasimasut Ole Martinsen oqaluttuarpoq, ukioq mannali ilaatigut Qaanaamit aamma Tunumit holdit peqataapput, taamaattumik holdit arfineq-pingasut peqataallutik.

Pissartanngoqqinnini sungiusaasup nuannaarutigaa, unammiuaarnissamullu sungiusartorujussuusimallutik oqaluttuarpoq:

- Holditta aaqqissuussaanera sungiusarsimaqaarput, tassa taarseraalluni sukkasuumillu saassussilluni arsarneq, aamma illersuinitta saassussinittalu oqimaaqatigiissarnissaat sungiusarnikuuarput, Ole Martinsen oqarpoq.

Sapaatip-akunnerani matumani angutit futsalimi pissartanngorniupput.