NP-rnissaraluit arlallit peqataasussakippallaarmat taamaatiinnarneqartut

Allaaserisap saqqummersinnerani allaqqaqqaaraluarpoq, Tasiilameersut ATA-kkut akissaqannginnertik peqqutigalugu NP-mut ilaasinnaajunnaarsimasut, Kenneth Kleistilli kingorna erseqqissaatigaa ATA-rmiut arsartussakinnertik peqqutigalugu NP-mut ilaasinnaajunnaartut.

“Ajoraluartumik nalunaarutigissavarput arnat silami NP unitsiinnarneqartoq, peqataaniarlutik nalunaartut ikippallaarnerat peqqutaalluni.” 

Kalaallit Arsaattartut Kattuffiata Facebookimi qupperneranut iseraanni siumugassat siulliit ilaat taama allaqqavoq.

Taamaatitsinernilli nalunaarutini taanna kisiartaanngilaq. U18-it nivissat nukappissallu, nivissat U15-it silami NP-rnissaat taamaatinneqartut nalunaarutinut ilaagami.

- Uggornarujussuarpoq, kisianni assigiinngitsut peqquteqarpoq, Kenneth Kleist oqarpoq.

Peqqutillu annersaannut ilaavoq unammiat akissaqartannginnerat.

- Bussersinnaasaruttaluunniit qanoq iluaqutaatigissagaluarpata, illoqarfimmiit illoqarfimmut. Kisianni taamaassinnaannginnerput akisoorujussuuvoq klubinut, timmisartortariaqarneq imaluunniit umiarsuartariaqarneq.

Aningaasat aalajangiisuusarput

Arsaanneq iligiittut timersornerummat inuit arlariiullutik angalasarput. Timersoqatigiiffiillu ilaasa NP-rtitsiniarlutik angalanerinnarmut miliuunit affaaniit 1 miliuunit koruunit tungaanut atorsinnaasaraat Kenneth Kleist oqaluttuarpoq. Taamaammat aningaasaliisut arlallit pinngitsoorneqarsinnaanngillat.

- Taanna 100 procentimik nassuerutigisariaqarpara.

Pilersaarusiorluarneq iluaqutaavoq

Aningaasaliisussat arlallit pisariaqartinneqarmata, timersoqatigiiffiit aningaasassarsiornissaannut KAK-mit eqqaasitsiuartaraluarput.

- 2024-mi oktobarimi novembarimilu klubit tamaaviisa allaffigivagut kommunimut qinnuteqaqqullugit, aappaagumut piareersimaneruniassammata, aningaasaqarniarneq assigiinngitsullu pillugit.

Angalanermummi aningaasartuutit taama annertutigitillugit aningaasaliisussat allat saniatigut kommunit avaqqukkuminaattarput.

- Kommunininngaanniit tapersersorneqanngikkunik, imaluunniit qinnuteqarsimanngikkunik aamma taanna akisoorujussuartut nalilerneqarsinnaagami, Kenneth Kleist oqarpoq.

NP-nut peqataasussat amerlanerutinniarlugit KAK-mit immikkut aamma iliuuseqartarput. Timersoqatigiiffiimmi nalunaarnissaat kinguartittarpaat.

- Ikippallaarsimappata kinguartittaqattaartarparput. Taamaammat allaffimmiut suleqatigut ulapissuaartarput, kinguartitsineq ulapputigineqartarmat.

- Iliuuseqangaatsiarsimavugut. Kisianni aamma oqarsinnaavugut amerlanerusimasuugutta, imaluunniit periarfissaqarnerusuugutta soorunami aamma iliuuseqarnerusinnaagaluarpugut assigiinngitsumik. Kisianni ullumikkut sulisut allaffimmiut marluinnaagallarput, Kenneth Kleist oqarpoq.

Angutit NP-rnissaat soqutigineqarluarpoq

Naak ukioqatigiiaat allat NP-rnissaat taamaatiinnarneqaqattaaraluartut, angutit juulip 28-aniit aggustip pingajuanut Nuummi NP-rnissaat soqutigineqarluarpoq. Aamma nunanit allaniit.

- Nunarsuatsinniit aatsaat taama isiginiarneqartigaagut, Kenneth Kleist oqarpoq.

- Nunarsuatsinninngaanniit tusagassiortorparujussuit ullut tamangajaaviisa allattarput.

KAK-p amerikamiut caribiamiullu arsaattartuisa kattuffissuanut CONCACAF-imut ilaasortanngorusulluni qinnuteqarnikuunera matumani peqqutaavoq.

- CONCACAF-imut qinnuteqarsimanitta taanna sunniutigaa.

Nunatsinni arsaattartut nunanut allanut sanilliullugit amerlanerujussuupput. Assersuutigalugu Danmarkimi DBU-p naatsorsuinera malillugu innuttaasut 5,6 procentii arsaattarput. Tysklandimi innuttaasut 8,3 proentii arsaattartuusut. Nunatsinnili innuttaasut 10 procentingajai, 5.500-t missaaniittut arsaattarput.

Tusaamasaassutinullu taanna ilaavoq.

- Taanna 10 procenti angisoorujussuugami allanut sanilliullugu. Tusaamasaassutigilaarparput, Kenneth Kleist naggasiivoq.