QAANNAMIK UNAMMERSUARNERIT NAAMMASSISUT:
Nukarlersat maligassiuilluarnerpaapput
Qaannamik unammersuarermi meeqqat ukiukikkaluarlutik sapiissuseqarnertik eqqissisimanertillu maluginiarneqarluaatigaat.
Qaannamik unammersuarni peqataasuni nukarlersat piumassusermik takutitsillualaavipput.
Assi: Angerlaq A. Olsen
Johanne Tobiassenip, tassa Qaannat Kattuffiata siulittaasuata, nunat tamalaat qaannamik pissartanngorniunerit naammassineqaqqammertut aaqqissuunneqarnerat kingumut qiviarnerini tulluusimaarutigai.
Peqataasuni pingaartumik inuusuttut ukioq manna unammersuarnerni takutitsilluavipput.
Meeqqat unammersuaqataanerminni kinngusoortut arlaqarput, taakkuali makeqqeriarlutik ingerlaqqittarput. Taakkunannga ataaseq tallimanik ukiulik sulilu atualernikuunngitsoq kinngusooraluarluni makeqqeriarluni ingerlaqqinnera immikkut maluginiarneqarpoq. Meeqqat ukiukikkaluarlutik silarloqattaaraluartorlu sapiissuseqarlutik eqqissisimallutillu immami unammersuaqataanertik siusissukkullu sungiusartarnissap eqqarsartaatsikkullu nukittuujunissap qanoq pingaaruteqartigineranik takutitsinertik maluginiarneqarluaatigaat.
- Meeqqat taakku peqataaginnarnatik ilutiminnut inersimasunullumi aamma maligassiuilluarput, Johanne Tobiassen tulluusimaarluni oqarpoq.
Unammersuaqataasut 163-iusut soorlu USA-meersuupput, Tysklandimeersuupput nunatsinnilu sumiiffinni tallimani: tassa Nuummi, Sisimiuni, Ilulissani, Qaqortumi Tiniteqilaamilu qaannamik peqatigiiffinneersuupput. Unammersuarnermi unammissutaasut tamarmik naammassineqarput, pilersaarusiortoqarluarsimanera aamma aaqqissuisut, dommerit kajumissutsimillu suleqataasut suleqatigiilluarsimanerat pissutaallutik. Unammersuarnerit ataatsimoorfiupput, akisussaaqatigiiffiupput isumassarsiffiullutillu – nukarlersat siuttuuffigisaannik.
