Nunakkut arpatsitsisarnissat tulleriiaat aallartittut

Nuuk Trail Series aallartinneqarpoq – iluatsilluartumik. Arpatsitsineq siulleq Nuuk Trail 10K 43-nit peqataaffigineqartoq aggustip arfineq-aappaanni ingerlanneqarpoq, asimi alianaalluinnartumi qungujulasoqarluarluni kiaguttoqarlunilu.

Arpatsitsinermi siullermi Patrick Döppingip aamma Mika Lyberthip periarfissamik aallartitsilluarnerannik ersarissumik takutitsivoq. Tassami Nuummi arpannissamut neqeroorutit amerlagaluartut – suliniuteqartut taakku marluk oqaatigaat – neqeroorummik inunnut siamasissunut kajungernartoq amigaataasimasoq. Tassami marluullutik qaffasissumik arpattartuugaluarlutik nuannarinerusarpaat ataatsimoornerit, siamasissumik timersornerit aamma assigiinngiiaartuuneq.

Sukkasuumik arpannissamut ataatsimoornermullu inissaqartitsisoq

Nuuk Trail Series-ip aallartinneqarneranut pissutaasoq tassaavoq, arpattartut tamarmik peqataaffigisinnaasaannik – qanoq arpallaqqitsigineq apeqqutaatinnagu - najukkami peqatigiiffimmik pilersitsinissamik kissaateqarneq.

- Nuuk Trail Series kikkunnut tamanut ammasuummat tusarliukkusupparput – inuttut nammineq rekordiliiniartunut aamma pinngortitami arpannermik nuannaarutiginnillutik arpattartunut, Patrick Döpping oqarpoq, taanna Mika Lyberth peqatigalugu suliniummik aallarniisuuvoq. Arpattartut taakku marluk Nuummi arpattartut ataatsimoortarnerat aqqutigalugu imminnut naapipput – suliniummilu inuttut attaveqaqatigiinneq pingaaruteqarluinnarpoq.

- Nunakkut arpaqataaneq arpaqataasunik ilisarisimasaqalernissamut periarfissatsialaavoq, Patrick Döpping qungujulaqaluni oqarpoq.

Arpaffiit takivallaannginnerat pissutigalugu peqataasut amerlanertigut eqimattakkaarlutik arpaqatigiittarput, tamannalu torrutiinnarlugu attaveqaqatigiinnermik pilersitsisarluni, nutaamillu ilisarisimasaqalernerit sukkasuumik pilertarlutik.

Nuummi arpatsitsinerit arlallit aaqqissuunneqartaraluartut, Patrickip Mikallu peqataaffigiuminarnerusumik arpatsitsinerit amerlanerusunut ammanerulertariaqartut paasivaat.

- Nuummi arpatsitsinerpassuit aaqqissuunneqartarput – takisuunik, ilungersunartunik piffissartornartunillu, aamma akisuunik peqataaffigineqarsinnaasunik. Mikalu paasigatsigu arpatsitsinerit amerlanerusunut aqqutissiuussisinnaasut pisariaqartinneqartut: Najukkami asimi arpatsitsinerit, akikinnerit kikkunnullu tamanut ammasut, Patrick Döpping nassuiaavoq.

Taakkua suleqatigiinnerat assigiinngissuteqarnermik ataatsimullu soqutigisaqaqatigiinnermik tunngaveqarpoq. Mika Nuummi inunngorpoq peroriartorlunilu, nunap ilusai nalunngilai najukkamilu attaveqaqateqarluartuulluni. Patrick ukiumi ataasiinnarmi Nunatsinni najugaqarsimavoq, kisianni nutaanik isiginnittaaseqarpoq timersornermut tunngasunik aqutsinermik ilinniagalik timersornerullu silarsuaani misilittagaqarluni. Taassuma Facebookimi qupperneq ’Trail Running Greenland’ aallartippaa, Mikallu piffissami sivisuumi takorloorsimallugu najukkami arpatsitsisarnernik pilersitsisinnaanissaq. Taakku marluk naapikkamik peqatigiillualerput – Nuuk Trail Series-ilu pilersippaat.

Arpannerinnaanngitsoq

Patrick Döppingimut arpanneq qasujaallisarnerinnaanngilaq, pinngortitamik nuannarisaqarnermik ersersitsivoq - eqqissisimalersitsisarlunilu isumassarsianillu nutaanik paasinnilersitsisarami.

- Pinngortitaq nuannaraara – pinngortitamilu arpanneq nuannaralugu. Tamannamiuna pissutigalugu Kalaallit Nunaannut nuuttunga, qungujulalaarluni oqarpoq.

Kalaallit Nunaanni arpanneq immikkorluinnaq ittuugami, nunap ilusaani arpannermi teknikimut ilungersunartut pissutigalugit. Aqqusinermi asfaltimit assigiiaaginnartumit allaanerulluinnartumik teknikikkut unammillernartoqarami, aammali isikkivik alutornarluinnarami. Patrick Döppingip neriuutigaa, Nuuk Trail Series aqqutigalugu misigisaq tamanna amerlanerusunut ingerlateqqissinnaassallugu.

- Nutaanik isumassarsinissanut, eqqarsaatit eqqissisimalluni katersornissaannut periarfissaagami, oqarpoq, unillatsiariarluni illarluni ima nangilluni:

Aammattaaq nuannersinnaavoq pinnguarnerinnaallunilu — kiffaanngissuseqarluni timimik aalatitsineq.

Nunatta nunataanik attorneqarsimanngitsumik kusanartumillu misilittagaqarusuttunut, Nuuk Trail Series-imi arpaqatigiinnissaq tulleq septembarip 18-ianni ingerlanneqassaaq.

Qasujaallisaatigalugu arpattartunut aamma misilittagaqarluartunut inissaqarpoq, Patrickip Mikallu peqataasorpassuaqarumaartoq neriuutigaat – aamma inuit amerlanerusut paasilissagaat pinngortitami arpanneq ajornanngitsuararsuusoq, kiffaanngissuseqarfiulluni, ataatsimoorfiulluni pinngortitamillu nuannaarutiginniffiusoq.