Kathrine Mikkelsenip seeqqumigut ajoquseqqanini pissutigalugu assammik arsartarnini ukiuni marlunni unitsikkallarsimavaa. Assammilli arsarnerup silarsuaaniikkunnaarnissamik kinguneqanngilaq. 33-nik ukiulimmut Kathrine Mikkelsenimut inuusuttunut nunanut allanut unammisartunut sungiusaasumut ikiortitut, aggustillu aallaqqaataaniit sungiusaasutut suliassaaleqinanngeqaaq.
Katrine Mikkelsen timimut sungiusaasutut ilinniarsimasuuvoq Silkeborgimilu najugaqarluni. Viborgip napparsimmavissuani sianiuteqarfinnut sungiusaasutut sulivoq.
Kathrine Mikkelsenip seeqqumigut ajoquseqqanini pissutigalugu assammik arsartarnini ukiuni marlunni unitsikkallarsimavaa. Assammilli arsarnerup silarsuaaniikkunnaarnissamik kinguneqanngilaq. 33-nik ukiulimmut Kathrine Mikkelsenimut inuusuttunut nunanut allanut unammisartunut sungiusaasumut ikiortitut, aggustillu aallaqqaataaniit sungiusaasutut suliassaaleqinanngeqaaq.
Katrine Mikkelsen timimut sungiusaasutut ilinniarsimasuuvoq Silkeborgimilu najugaqarluni. Viborgip napparsimmavissuani sianiuteqarfinnut sungiusaasutut sulivoq.
Taanna kalaallit unammisartut piukkunnaatillit Danmarkimi sungiusaqatigalugit Fynip kujataani sapaatip-akunnerata naanerani Gudmemiippoq. Sapaammi ualikkut Silkeborgimut angerlapallappoq. Arnat nunanut allanut unammisartui Islandiliaqatigissallugit atisassamaatiminik nutaanik aallertariaqarpoq, taakkulu sapaatip-akunnerani matumani sungiusariaartigalutik Islandip U20-nut unammisartuinut unammillutik Islandimiipput.
Misigisat puigunaatsoq
Katrine Mikkelsen Silkeborg-Voel KFUM-imi Danmarkimi 2. divisionimi unammisartuuvoq. Silkeborgip arnat holdianni sungiusartarsimavoq, Silkeborgillu qaffasinnerusumik unammisartunngoqquneqarnissaa sioqqullugu 1. divisionimi unammisarsimalluni. Assammik arsartartuunermiit ilinniagaq suliffillu pingaarnerujuaannarsimapput.
2010-miilli Kalaallit Nunaat sinnerlugu 35-t missiliorlugit nunanut allanut unamminikuuvoq.
- Nalaatsornerinnakkut nunanut allanut unammisartunut ilanngunnikuuvunga, Kathrine Mikkelsen oqaluttuarpoq.
- Niviarsiaqqat Kalaallit Nunaanneersut unammeqatiginerini Kalaallit Nunaannut qanoq attaveqarnersunga aperineqarpunga.
- Aanaga Sisimiuneersuusoq, aataga anaanagalu sisamanik ukioqartoq Danmarkimut aallarsimasut oqaluttuaraara. Tassanngaanniit suut tamarmik sukkaannaq pipput. Sapaatit-akunneri arlaqanngitsut qaangiummata kalaallit nunanut allanut unammisartut ilagalugit Argentinami unammiuaarnermut ilagaakka tamatumalu kingorna puigugassarinngisannik misigisaqartarsimavunga.
- Assammik arsartarneq pissutigalugu Mexicomut, Koreamut Kujallermut, Puerto Ricomut, Savalimmiunut, Islandimut, Cubamut, Argentinamut Kalaallit Nunaannullu arlaleriarlunga angalasarnikuuvunga.
- Uannut misigisat annertupput, Assammik arsartarnerlu Kalaallit Nunaannut attaveqarnerulissutigisimavara.
Sungiusaasutut sulinera
Kathrine Mikkelsenimut sungiusaasuuneq nutaajunngilaq. Ukiorpassuarni niviarsiaqqat nukappiaqqallu qaffasissumik sungiusartarsimavai. Unammisartuujutigaluni Silkeborg-Voel KFUM-imi sungiusaasuuvoq, maannakkullu inuusuttut nunanut allanut unammisartuini sungiusaasumut ikiortitut atuuffeqareerluni sungiusaasunngorluni.
- Islandimut angalareeruma inuusuttut nunanut allanut unammisartut ilagalugit Mexico Citymi IHF Trophy Cupimi peqataassaanga, Kathrine Mikkelsen oqaluttuarpoq
Unammiuaarneq tamanna nunarsuarmi pissartanngorniunnissamut anngunniunnernut 20-nut ilaavoq.
- Soorunami iluatsitsisariaqarpugut ajoqusernerillu pinngitsoortinniarlugit, isumaqarpungali aappaagu aasaru nunarsuarmi pissartanngorniunnissamut anngunnissatsinnut periarfissaqarluartugut, Kathrine Mikkelsen naggasiivoq.
Mexicomi unammiuaarnermi ajugaasup tullertullu inissittut nunarsuarmi pissartanngorniunnissamut anngutissapput.
Sungiusarujussuarneq
Kathrine Mikkelsen ajoqusertarnikuunermigut sungiusarnissap qanoq pingaaruteqartiginera ilisimaarilluarpaa.
Aamma assammik arsartartut timikkut assoroornerit sakkortuut sapissanngikkaanni qasujaallisarlunilu nukkassarnissaq pingaaruteqarpoq.
Ukiuunerani eqqissisimaarnissaq qilanaarigaa
Kathrine Mikkelsenip Mexicomut angalanerup kingorna eqqissisimanerunissaq qilanaaraa.
Ukiup affaani misigisarpassuaqareerluni, unammiuaarnernut katersuunnernullu angalasaqattaareerluni, kalaallit piukkunnartut Danmarkimi decembarimi katersuunnissaat kisimi pilersaarutaavoq.
