Qaannamik pissartanngorniunnerit Qaqortumi aallartipput
Qaannamik pissartanngorniunnerit pisortatigoortumik tallimanngormat ammaanersiorneqarput. Peqatigiiffik Qajaq Qaqortoq ukioq manna aaqqissuussisuuvoq. Tallimanngornermi ammaanersiorneq tallimanngormat aallartimmat inuit 100-it missaaniittut peqataapput.
Foto: Poul Hard
Ulluni makkunani Qaqortumi qaannat immamiittut takussaassapput. Qaqortumimi qaannamik unammersuaarnerit tallimanngornermi aallartipput, illoqarfiit tallimat peqataaffigisaannik.
Unamminersuaarneq tallimanngormat juulip ulluisa 12-anni nalunaaqutaq ullaakkut qulit qeqqa ammaanersiorneqarpoq. Peqatigiiffik Qajaq Qaqortup illuata silataani pilluni.
Erfalasut tallimat amuneqarput, illoqarfiit tallimat ukioq manna peqataammata.
Erfalasut amuneqareermata peqataasut Gertrud Raskip oqaluffiata tungaanut ingerlaaqatigiipput, tassani palasi Paarma Andersen naalagiartitsilluni. Imaani ajunaarsimasut aamma eqqaaniarneqarput.
Naalagiareernerup kingorna nalunaaqutaq marlut qeqqaniit ataasiakkaarlutik kinngusaqattaarlutik unammersuaarput. Tassani 15-niit 50-it sinnerlugit ukiullit unammillutik.
Ullormi ajugaasut
Milo J. Frederiksen Nuummeersoq nukappiaqqani quliniit aqqanilinni ukiulinni ataasiakkaarluni kinngusaqattaarnermi ajugaavoq, taassuma minutsi ataaseq sekundillu 20-it atorpai.
Niviarsiaqqani 13-iit 14-nut ukiulinni Nadia Enoksen nuummeersoq ajugaasutut aamma allassimavoq, taassuma minutsit 14-it 26 sekundillu atorpai.
Pakkutaq Egede niviarsiaqqani 15-niit 17-inik ukiulinni ataasiakkaarluni kinngusaqattaanermi ajugaasuuvoq, taassuma minutsit 18-it atorpai.
Qaannat Kattuffianni siulittaasup paasissutissiissutigaa angusai appimi "Sportity"-mi takuneqarsinnaasut, isissutissaq"QU1985"atorlugu.
Qaannamik unammersuaarnerit juulip 19-ata tungaanut pissapput. Naammassippata Ulf Fleischer Tomba Jamili tusarnaartitsissapput.
