Savalimmiuni immussualiorfimmit ikiuunneq sungiusaasunik nutaanik atorfinitsitsinermik kinguneqarpoq
Savalimmiuni immummik tunisassiortoq MBM-ip assammik arsartartut kattuffiat TAAK arnat nunanut allanut unammisartuinut sungiusaasussanik nutaanik atorfinitsitsisinnaalersillugu ikiorpaa.
TAAK siulittaasua Carsten Olsenip arnat nunanut allanut unammisartut sungiusaasuat nutaaq, Mikkil Bom, tikilluaqquaa.
Assiliisoq: TAAK
Assammik arsartartut kattuffiannit nutaarsiassatsialaqarpoq. Taakkumi VM-imi peqataanermiilli aningaasatigut ajornartorsiuteqarsimapput, ilaatigut arnat nunanut allanut unammisartuinut sungiusaasuusimasoq Anders Friis soraartariaqalerluni.
Maanna kattuffik Savalimmiuni immummik tunisassiortut MBM-ip aningaasatigut ikiorsiineratigut arnat nunanut allanut unammisartuinut sungiusaasussanik nutaanik atorfinitsitsivoq.
TAAK-ip siulittaasua Carsten Olsen atorfinitsinneqarnera pillugu ima oqarpoq:
- Kattuffimmiit nuannaarutigeqaarput sungiusaasunngortut nutaat ilisaritissinnaagatsigit, Mikkel Bom aamma Kim Ostermann-Petersen. Taakku marluullutik isumaqarput nunanut allanut unammisartussatut piukkunneqartut qaffasinnerusumut ingerlatinneqassasut. Sungiusaasunngortut tamarmik Nuummi najugaqarput, taamaasillutillu qanimut ikioqatigiillutik ulluinnari suleriaaseqarsinnaallutik, tamanna nukittorsaataavoq, TAAK-mi siulittaasoq Carsten Olsen tusagassiutinut nalunaarummi oqarpoq.
Kim Ostermann-Petersen atorfinitsinneqarpoq aappassaanik, tassami taanna atorfik siornatigut atorfigisimavaa, Anders Friis sungiusaasuugallarmat.
Assiliisoq: TAAK
Unammiuaarnerni anngunniuteqataaqqissasut
Mikkel Bom DHF-imi divisionimi piginnaasanillu sungiusaasutut ilinniarsimavoq, ilaatigut Team Esbjergimi sungiusaasuusimalluni, ilisimatitsissutigineqarpoq.
- Taamaasillunilu aaqqissuussaanermi nutaami pingaaruteqalertussaavoq TAAK-mi nunanut allanut unammisartuni/piukkassanik ineriartortitsinermi suliaqalernitsinni. Tamanna aallarnerneqarpoq Jakob Larsen siuttoralugu, TAAK allappoq.
Mikkel Blom oqarpoq kattuffiup finalimut anngunniunnerit tamatigut anguniagarisariaqarai, iluatsitsilluarnissarlu qilanaaraa:
- Arnat nunanut allanut unammisartut sivisuumik malinnaavigivakka, amerlasuut Danmarkimi 1. aamma 2. divisionimi takoreerpakka, taamatuttaaq nunatsinni pissartanngorniuummata malinnaavigaakka. Kalaallit Nunaani assammik arsarnermi piumassuseqarneq anguniagaqarusunnerlu pikkugeqaara, suleqatigineqartullu saarngit tikillugit pimoorussinerat.
- Nunanut allanut unammisartuunermi suliassamut qilanaaqaanga unammisartullu killiffissamut tullermut kivinnissaannut. Aammalu Anders Kim-illu annertuumik suliarisimasaat nangeqqinnissaat, Mikkel Bom oqarpoq.
Aningaasaliisup nutaap peqatigiiffik ikiulerpaa
Savalimmiuni immummik tunisassiornermik ingerlatsiviup MBM-ip pisortaa Hákun Steingrímsson oqarpoq suliffeqarfik nunatsinni immummik tunisassiornermik ingerlataqalerusuttoq, suliffeqarfiullu piffissami sivisuumi oqallisigisimavaa kalaallit amerlanerit qanoq pitsaanerpaamik anguneqarsinnaanersut:
- Ilissituulli maani Savalimmiuni assorujussuaq assammik arsarnermik soqutigisaqarpugut arnalllu nunanut allanut unammisartut VM-erlutik takutitsilluarmata soqutiginneqaluta isiginnaarpagut, Hákun oqarpoq nangillunilu:
- Maani Savalimmiuni sapaatip akunneranut ataasiarluta kalaallit nutaarsiassaatat takusarpagut. Nutaarsiassarlu nuanninngitsoq takkuteriarmiat, nunanut allanut unammisartut pillugit, sukkasuumik qisuariarpugut. Tamanna tamatsinnut iluaqutaasinnaasutut nalilerneqarsinnaavoq. Soorunami Kalaallit Nunaanni pisiassaateqalernissarput aallartikkusupparput, imminermilu tulluusimaarutissaalluni arnat nunanut allanut unammisartunut aningaasaliinermi anersaartortilaarsinnaallugit, pisortaq oqarpoq.