Sisimiuni sungiusaqatigiilluni katerinneq
Ujakkaarlutik arpattartut Sisimiuni sapaatip akunnerani uani takussaapput. Ukiukkut apummi takussaaginnaratik, aasaq manna Sisimiuni sungiusaqatigiillutik katerittut takussaapput. Sungiusaqatigiilluni katerinneq aallartilluartoq, Allatseqarfimmi siunnersortip, Majaq Heilmannip nalunaarutigaa.
Foto: Grønlands Skiforbund
Sisimiuni sineriak tamakkerlugu ujakkaartartut sungiusaqatigiinnermik katerinnerat aallartilluarpoq, Majaq Heilmann, Kalaallit Nunaanni Sisorartartut Kattuffianni allatseqarfimmi siunnersorti tusagassiuutitigut nalunaaruteqarpoq.
Peqataasut 40-nik ikinnerunngitsut katerinnermut peqataapput. Ulluni 10-15 juli katerittussaallutik. Pingasunngornermi juulip ulluisa qulingani ualigaa sungiusaqatigiinneq siulleq pivoq.
- Tassani ujakkaartartut inuusuttuaqqat aamma inersimasut nunap timaanut arpallutik sungiusaqatigiipput.
Majaq Heilmann naapertorlugu Pipaluk Kristensen inuusuttuaqqanut nukarlernut sungiusaasuuvoq, taakkulu naannerusumut arpallutik.
Inersimasut inuusuttullu angajulliit takkajaamut Alanngorsuaq kaajallallugu arpapput Inersimasunut inuusuttunullu angajullernut sakkortunerumaamik sungiusaqatigiittoqassaaq, qasujaassuseq peqataasunut pitsanngorsarniarlugu. Tassanilu sungiusaasuupput Martin Møller aamma Majaq Heilmann.
Kangerlussuarmi sungiusaqatigiinnerit ukiuni kingullerni pisarput, ukioq mannalu Sisimiuni sungiusaqatigiilluni katerittoqarpoq.
- Ukiuni kingullerni aasaanerani sungiusaqatigiinneq Kangerlussuarmi ingerlanneqartarpoq. Tamannalu imminerminik ajoquteqanngilaq kisianni, ilaanni allannguilaarnissaq pisariaqartarpoq. Ukioq manna Sisimiuni sungiusaqatigiinnissaq assut kajumigineqarsimavoq peqataasullu amerlineranik kinguneqarluni. Aammalu immikkut pissangassutigaara qilanaaralugulu aaqqissuussamut Qaqqatoqqamut peqataanissarput, Marie Fleischer Ujakkaartartut Ataatsimiititaliaani siulittaasoq aammalu sungiusaqatigiinnermut peqataasoq oqarpoq.
Ataatsimiititaliaq nutaaq
Nutaamik ataatsimiititaliamik, Ujakkaartartut Ataatsimiititaliamut aprilimi qinersisoqarpoq.
Ataatsimiititaliup nutaap maanna katerinneq siullertut aaqqissuussarivaat. Ataatimiititaliami nutaami uku qinigaanikuupput:
Siulittaasoq: Marie Fleischer – NSP Nuuk
Siulittaasup tullia: Arnatsiaq R. Heilmann – SSP Sisimiut
Aningaaserisoq: Flemming Enequist – NSP Nuuk
Allatsi: Angutivaraq Tønnesen – ASP Aasiaat
Ilaasortaq: Nivika Lange Lyberth – NUP Nuuk
