Ukiut 50-ini qimusserluni sukkaniuuttartoq:
- Siunertarinngikkaluarpara
78-nik ukiulik Ville Siegstad 1975-mili Qimussersuani peqataasareerluni aalajangerpoq ukioq manna naggataamik sukkaniuuteqataalluni
Ville Siegstad Ilulissani martsip aappaani naggammik Avannaata Qimussersuanut annguniuuteqataavoq.
Nammineq asseq
Avannaata Qimussersua Ilulissani weekendimi pisussami Iluliarmiu
qimussertartoq ilisimaneqarluartoq Ville Siegstad, Avannaata Qimussersua
pileqqaarneraniit peqataajuaannarsimasoq ukioq manna peqataassanngilaq. Avannaata
Qimussersuanut sukkaniuunnerni sisamariarluni 1996-mi, 2004-mi 2009-mi aammalu
2019-mi Avannaata Qimussersuanngornikuuvoq. Maannakkut utoqqanngornikuugami piffissanngorsoraa
sukkaniuuttarnermiik unissalluni.
- Sungiusarneq imaannaanngitsorujussuugami, nukiit
atortariaqarput, sualummik taamannak 80-t tungaanut ingerlaarluni.
Pisartagaqartunut
Allaaserisaq una Nutaarsiassaqartitsivimmi aviisit naqitat ilaanni allaaserisaavoq.
Allaaserisat pisartagaqartunit siunissami taamaallaat atuarneqarsinnaajumaassapput.
Atuarluarna.
Ville Siegstad ukiuni 50-ni qimussernerup iluani arlalinnik
nersornaaserneqarnikuuvoq: 2006-mi Naalakkersuisuniit nersornaammik sølviusumik
nersornaaserneqarpoq, 2014-mi ataqqinaammik nersornaaserneqarpoq, 2015-milu
ukiuni 40-ni ataannartumik avannaata qimussersuanut ilaasarsimanera pillugu
akissarsitinneqarpoq, 2017-milu namminersorlutik oqartussat kulturikkut
nersornaammik tunineqarluni.
- Siunertarinngikkaluarpara ukiut 50-t
unammisartuussallunga, qimusserneq nuannersuugami, qimmit ullup ilatsiarsua
ilagineri aamma imaannaanngitsuugami nuannerluni. Taanna nuannersisinnikuugakku
taamarujuk qimusserusaarpunga.
Avannaata Qimussersuanngorniuunnermi ilaasussaagaluartoq
Ukioq manna martsip aappaani Avannaata Qimussersuanut
anngunniuunnermi Ville Siegstad naggataarluni peqataavoq, ajoraluartumillu
anngutinngitsoorluni. Avannaata Qimussersuanut anngunniunnissaminut sungiusartussanngorluni
sakiani annersippaa, taamaakkaluartorli anngunniunnermi anniaraluarluni
peqataavoq.
- Maannakkut pitsanngoriartoraluarpunga kisianni tassa
oqarfigereerpakka ukiut 50-sissaani anngunniuunnermi ilaareerama ukioq manna Avannaata
Qimussersuani ilaassanngilanga.
Ukioq manna Qimussersuanngorniuuttoqarneranut
sukkaniuunnissamut peqataanissaminut neqeroorfigitikkaluarpoq, kisianni
ilaanissani itigartitsissutigisimavaa. Qimusserluni sukkaniuunnermi
sunaluunniit pisinnaasoq Ville Siegstadip ilisimalluarmagu, sukkaniuunnermi
ilaalinnginnini akueriinnarsimavaa.
- Ilaanni nangiteriasaarneq takkuttarpoq, qimmeersernerit,
perlataakujunnerit aqqunalaarnerillu. Uanga oqartarpunga tassa qimussernerup
nuannersui, tamakku tamarmik nuannequtaasarput.
Sungiusartarnerit sakkortuut
Ville Siegstad Avannaata Qimussersuani rekordiliisimavoq
sukkaniuunnermi amerlanerpaanik ilaasimagami, sukkaniuunnermilu piareersarnerit
aasaagaluarpat ukiuugaluarpalluunniit ulluinnarsiutigisimavai, namminermi
pingaartippaa nammineq qimminilu sukkaniuunnissamut piareersimanissaat.
- Qimussit tamarmik oqartarput Avannaata Qimussersuareeraangamik
aqaguaniit aappaagumut sungiusarneq aallartittartoq.
- Qimmeq inullu sungiusartussaapput, qimmit kalunnerni
uninngaannartut nukeerukkiartupallattaramik, sivikitsuinnarmilluunniit
uninngagaluaraangamik. Qimmit sammeruusaaginnarneqartussaasarput qimussertartutut
siunertaqaraanni.
Ville Siegstad Avannaata Qimussersuani 1989-mili
aallarteqqaarmat siuttuusalereerpoq. Avannaata Qimussersua Qeqertarsuup tunuani
kisimi ingerlanneqartarallarmat kisiartaalluni kommunini tamani
pissartanngortarsimavoq, kommuninilu sukkaniuuttuni pissartanngorniuunnerni
kisiartaalluni tamatigut annguttarsimalluni. Sukkaniuulluni qimussertarneq
imaannaasimanngitsoq Ville Siegstadip oqaatigaa.
- Sisimiuni ukioq kingulleq ilaagama 75
kiiluullunga qimussilerpunga, Sisimiuniit angerlarama oqimaalutaqqikkama
taamaallaat 67 kiiluinnanngorsimallunga. Qamutini issiaannarnerluunniit,
qamutit aalajuartuugamik, nukinik pisariaqartitsisaramik.
Qimussernermi sukkaniuunnerni ukiuni arlalini inuit Ville
Siegstadimut tapersersuisarsimapput aammali inuit nikassaasut ilaapput.
- Tapersersuisut nuannarinnittullu qujanartartorujuupput,
nuannersumik kiinnertaramik aammalu tapersersuinertik takutittarlugu. Taakku
nikassaasut aamma ilaasariaqarput, qanoq oqalukkumagunik oqalussapput kisianni
uniffissaanngillat.
Meeraallunili qimmit nuannarai
Ville Siegstad Ilulissani peroriartortoq meeraallunili
qimmeqartarsimavoq, inersimasunngornissamilu tungaanut qimmit qimussernerlu
aalluttuarsimavai, qimmit qimmiaraaneraniik qimuttalernissaata tungaanut
nammineq sungiusartarlugit. Nunatsinni qimusserneq kulturitsinnut assut
pingaartippaa, 2013-milu meeqqat Avannaata Qimussersuanut
peqataatinneqaqqaarmata Ville Siegstadip piviusunngortinnissaanut
peqataaqataasimavoq, namminermi isumaqarpoq meeqqat siunissami qimussernerup
iluani nukittorsaasuusussaasut. Massakkut Ville 78-nik ukioqaraluarluni suli
qimusserneq nuannarilluinnarpaa, Avannaata Qimussersuanilu sukkaniuunnermi
soraarninngoraluarluni qimussernerup unitsinnissaanut pilersaaruteqanngilaq.
- Qimussertalerluni uerinartuugami, ukiuni kingullerni
ingatsikkaluttuinnarpunga. Kammakka suli apinngitsoq qimusseraleraangata
usorilersarakkit, taamalillungalu aallaraangata maliinnartarlugit.
Avannaata Qimussersuani sukkaniuunnermi uninngikkaluaruni
ukioq tullissaanimut sungiusalereertussaalluni Ville Siegstadip oqaatigaa,
massakkulli uninnikuugami eqqissilluni eqiasoqqaarniarpoq.
- Unikkama oqarpunga ”pensionerpunga”, aamma qassinik oqaatiginerpara;
unilluni iluaq. Eqiasuataarumagaanni sujumagaanni.