TAAK-ip aningaasaqarnera ingerlalluaqqilersoq
Assammik arsartartut kattuffiat ukioq ataaseq aningaasatigut ajornartorsiungaareerluni maanna aningaasaqarnikkut ingerlallualeriartorluni nalunaarpoq.
Arnat nunanut allanut unammisartut 2023-mi nunarsuarmi pissartanngorniunnermut peqataanissaat TAAK-ip aningaasaqarneranut unammillernarsimavoq, ukiullu affaa qaangiutiinnartoq aningaasat nungupput
Assi: Leiff Josefsen
Timersoqatigiiffiit Assammik Arsartartut Kattuffiat (TAAK) ataasinngornermi ataatsimeersuarpoq.
Siunnersuutit pingasut TAAK-p aningaasaqarneranik nukittorsaataasussat, illoqarfinni assammik arsartartut pissartanngorniunnerannik siuarsaanermut aamma nunani tamalaani najoqqutassianut naapertuuttumik ukiut naapertorlugit immikkoortiterinermut iluaqutaasussat ataatsimeersuarnermi peqataasunit akuerineqarput.
Taama TAAK tusagassiutitigut nalunaarummi allappoq.
Periusissiap nutaap 2024-mi decembarimi suliarineqarnerata kingunerisaanik aningaasaqarneq siumut ingerlasoq aamma allassimavoq.
Arnat assammik arsartartut 2023-mi decembarimi nunarsuarmi pissartanngorniunnermut peqataanerata kingornali aningaasat nungussimapput. Maannali pitsanngoriartorpoq.
Tamanna TAAK-p aningaasanik aqutseqqissaarneranik pissuteqarpoq, assammik arsartartut kattuffiat Sermitsiamut allakkatigut akissuteqarluni allappoq.
- Aningaasaliisunut qinnuteqarfiusinnaasunullu qanimut attaveqaqatigiinnerit pilersinneqareerput, taamatuttaaq sungiusaasunik ilinniartitsinissat nukittorsarniarlugit Dansk Håndbold tapersersuisoralugu suliaq ingerlanneqarpoq. Tamanna pillugu TAAK isumalluarpoq.
10 millionit timersornermut
Tamatuma saniatigut TAAK-ip nuna tamakkerlugu pissartanngorniunnerni peqatigiiffiit tamarmik peqataanerminnut assigiimmik akiliisarnerat aaqqiissutigisarpaa. Aaqqissuussaq taanna aalajangersimasumik akiliuteqartarnikkut ukiorpassuarni ingerlanneqarpoq.
Tamanna ullumikkut akit malillugit aaqqinneqarpoq, allapput.
10 million koruuningajannik timersornermut immikkoortitsinissamik Naalakkersuisut siunnersuutaat Aningaasaqarnermut Akileraartarnermullu Ataatsimiititaliap apriilip 15-iani akuersissutigaa. TAAK-p aningaasaqarnini siumut ingerlatileraluarlugu aningaasaliissutit taakku ilaat pissanerlugit paasissallugu soqutigaat.
- Naggataatigut timersoqatigiit kattuffii allat assigalugit Namminersorlutik Oqartussat 10 million koruuninik timersornermut immikkoortitsinerat qanoq ingerlanneqassanersoq pissangatigaarput, TAAK allappoq.
TAAK periusissiaq nutaaq naapertorlugu kattuffimmik patajaatsumik ineriartortitsissaaq. Aningaasaqarnerup patajaatsuunissaanik sulissuteqarnerup saniatigut sungiusaasunik aqutsisunillu ilinniartitsineq ingerlanneqassaaq.
- Naak VM 2023 unammillernaraluartoq, ataatsimoorluta kattuffiup siumut ingerlaleqqinnera malugalugu isumalluarnaqaaq, ilaasortaqarniarnerit amerliartortillugit. Suleqatigiiulluta nukittuujuvugut timersuuterpullu assigiinngitsunik imaqartarsinnaasoq eqqissisimatitsinissaanut ataatsimoorluta. Ataatsimoorneq, unammersuaarnerit angusaqarusussuseqarluta anguniakkanut tunuliaqutaapput. Nukittoqaagut pissanganartunillu ornitaqarluta, Carsten Olsen tusagassiutitigut nalunaarummi oqarpoq.
Taanna ataatsimeersuarnermi kattuffimmi siulittaasutut qinigaaqqippoq.
