TAAK-ip aningaasaqarnera pillugu naalakkersuisoq nalunaaruteqarpoq
Kalaallit Nunaanni Timersoqatigiit Kattuffiata nassuiaataani inerniliunneqarpoq "TAAK-ip ukiuni kingullerni annertuumik nunanut allanut unammisartunik ingerlatsisimanera tunngaviatigut ajunngikkaluartoq, aningaasarpassuarnilli naleqartup pilersaarusiornerlunnikkut pingaarnersiuinerlunnikkullu ingerlanneqarsimanera pitsaasuunngitsutut nalilerparput". Timersornermut naalakkersuisoq taamatut ilisimatitsivoq.
- Ukioq tapiiffiusoq tamakkerlugu TAAK-ip nammineq aqutassaraa, naalakkersuisoq Aqqaluaq B. Egede (IA) naqissusiivoq.
Toqqorsivimmit assilisaq: Leiff Josefsen
Assammik arsartartut kattuffiat TAAK aningaasatigut ajornartorsiornera sapaatip-akunnerata siuliani Sermitsiami allaaserineqarpoq.
Aningaasatigut ingerlalluaqqilernissaata tungaanut pilersaarutit arlallit taamaatiinnarneqartut, nunanullu allanut unammisartunut sungiusaasut akissarsiaqarunnaarsimasut, kattuffik Facebookikkut nalunaarpoq.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Aqqaluaq B. Egede (IA), kattuffiup nalunaarutaa pillugu allaaserisaq tunngavigalugu tusagassiuutinut nalunaaruteqarpoq.
TAAK ukioq manna, Aalasap aningaasaateqarfianit tapiissutit ilanngullugit, katillugit 3.148.196 koruuninik tapiiffigineqarumaartoq, naalakkersuisoq tusagassiuutinut nalunaarummi allappoq.
Aningaasaqarnerliorneq sulissutaasoq
-Ukioq tapiiffiusoq tamakkerlugu TAAK-ip nammineq aqutassaraa, naalakkersuisoq Aqqaluaq B. Egede (IA) naqissusiivoq.
Naalakkersuisoq naapertorlugu aasap ingerlanerani Kalaallit Nunaanni Timersoqatigiit Kattuffiat (GIF) suleqatigalugu TAAK-ip aningaasaqarniarnikkut unamminartorsiornera qulaajarlugulu aaqqiiviginiarlugu naapeqatigiissimapput.
Tamatumunnga atatillugu TAAK-ip siulersuisuinit akuerineqartussamik isumaqatigiissuteqartoqarpoq:
- GIF-ip kaammattuutigisimavaa TAAK-ip 2024-imi pilersaarutini unitsikkallassagai, aningaasatigut suli amigartooruteqarnerulernissaq pinngitsoortinniarlugu. Isumaqatigiissutissaq akuerineqarpat, TAAK-ip aningaasaqarnera 2025-ip naalernerani ilorraap tungaanut aallarsimassaaq.
- Tamassuma kingunerissavaa nunani allani timersoriarnerit ikilinissaat, nunatsinni timersornerit kalluanngikkaluarlugit, naalakkersuisoq allappoq.
- Pilersaarusiornerlunneq pingaarnersiuinerlunnerlu
Siorna VM-imut peqataanerup aningaasaqarnikkut artornartorujussuunera TAAK-ip nammineq innersuussutigaa.
Assammik arsartartut kattuffiata tungaanit pilersaarusiornerluttoqarsimasoq GIF aamma isumaqartoq, naalakkersuisoq ilisimatitsivoq:
- TAAK-ip ukiuni kingullerni annertuumik nunanut allanut unammisartunik ingerlatsisimanera tunngaviatigut ajunngikkaluartoq, aningaasarpassuarnilli naleqartup pilersaarusiornerlunnikkut pingaarnersiuinerlunnikkullu ingerlanneqarsimanera pitsaasuunngitsutut nalilerparput. Taamaattumik TAAK pingaarnersiuilluni pilersaarusiornermi aningaasat atorneqarsinnaasut aallaavingalugit pilersaarusiortarnissaa sakkortuumik kaammattuutigisimavarput, aningaasaliissutit iluini pilersaarusiortarnissaq anguniarlugu suliniuteqartarnisaat oqariartuutigalugu, Aqqaluaq B. Egede naapertorlugu GIF nassuiaammini allappoq.
