Tiniteqilaameersut aqqaneq-marlunnik ujamminnattut
Magnus Kristiansenip, tassa Tasiilami Sammisassaqartitsinermut kulturilerinermullu immikkoortortami aqutsisuusup, illoqarfigisaminni qajartortartut peqatigiiffianneersut nunatsinni qaannamik ukioq manna unammersuarnerni takutitsilluarnerat, nuannaarutigigaa, Kommuneqarfik Sermersooq tusagassiorfinnut nalunaarummini allappoq.
Tasiilap avannaani qajartortartut peqatigiiffianneersut ineriartortitsinissamik ukiorpassuarni sulissuteqareernerisa kingorna nunatsinni qaannamik ukioq manna unammersuarnerni arlalinnik ujaminnapput.
Foto: Kommuneqarfik Sermersooq
- Gultinnannikkut, sølvinnannikkut aamma bronzennannikkut klubbimi inuusuttut qajartortartut siunnerfilimmik sungiusarneq, ataatsimoorfiusumi aamma piumassuseqarfiusumi nuna tamakkerlugu qanoq angusaqarfiusinnaanersoq takuteqqippaat, tamannalu Tasiilamut Tunumilu tamarmi annertuumik pisuunnguallaataavoq, Magnus Kristiansen tusagassiorfinnut nalunaarummi issuarneqarpoq.
Tiilerilaami Tsaqqid Peqatigiiffimmeersut nunatsinni qaannamik ukioq manna unammersuarnerni bronzennapput, sølvinnapput kuultinnallutillu. Taakkua ujammittaavi katillugit aqqaneq-marluupput: Taakkunannga tallimat kuultiupput, marluk sølviupput, marluk bronzeupput, peqataasunilu marluk kajumissaaserneqarput ataaserlu nunat tamalaat akornanni immikkut ittumik aamma kajumissaaserneqarluni.
Tsaqqid Peqatigiiffimmi aqutsisoq Max Yves Audibert peqatigiiffitsik ineriartorneranut ukiorpassuarni tunngaviulluinnarsimavoq.
- Tunniusimangaarluni sungiusaasutut, aaqqissuussisutut, aningaasaliisussarsiortutut maligassiuisutullu atuuffiit tigummivai. Iliuuseqarnermigut nunaqarfimmi meeqqat inuusuttullu nunatsinni qajartoriaatsimik angusarissaarnissamullu periarfissippai, kommunimit allapput.
