U18-it Kinami VM-ertoqarnissaanut piareerput

Arnat assammik arsarlutik nunanut allanut unammisartut U18-it Kinami nunarsuarmi pissartanngorniunnissamut angalannginnerminni sungiusarput.

Unammisartut 16-it nunanut allanut unammisartunut sungiusaasumit Victoria Budek Svendsenimit siulersorneqarlutik Skærbækcentretimi Sønderjyllandimiittumi naggataarutaasumik sungiusarput.

Unammisartut 16-iusut ilaat qulit Nuumminngaanneerput, ataaseq Ilulissaneersoq, marluk Sisimiuneersut pingasullu Danmarkimi ulluinnarni unammisartuullutik.

Unammisartut Danmarkimit Kinamiittumut Chuzhoumut ataasinngornermi aallassapput, tassanilu nunat 32-t puljenut arfineq-pingasunut agguataarsimasut pokalinnanniutissallutik. Arnat U18-it qulissaanik nunarsuarmi pissartanngorniussapput.

Kalaallit Nunaat Danmark, Kina aamma Kiinamiut illoqarfiat Taipei, Taiwanimik taaneqartartoq puljeqatigissavaat, taamaattumik unamminerit sakkortuut unammissutigissavaat.

Sungiusarluni unamminerit

Nunanut allanut unammisartut Tønderimi inuusuttut inersimasullu sungiusaatigalugu unammivaat. Unamminermi unammisut sukataarluarput 34-24-mik ajugaallutik, muminnermi 17-13-imik siuaqqallutik.

Sapaammi ullaap tungaani nalunaaqutaq 10.00 nunanut allanut unammisartut Danmarkimi sungiusaatigalugu unamminerminni kingullermi SønderjyskE-mut U18-it unammisartuinut unammisussaapput.

Sungiusaasoq iluarisimaarinnittoq

- Nuannaarutigeqaara taama akiuutsigigatta, aamma nuannaarutigeqaara sapinngisatsinnik takutitsilluaratta, Victoria Budek Svendsen Tønderimut unamminerup kinguninngua oqarpoq.

- Assigiinngitsunik misilittavugut, tamarmik unamminermi piffissaqartinneqarlutik. Allaat arfineq-marluk arfinilinnut unammilluta sungiusarluta, ajugaanerlu soorunami nuannersuuvoq.

- Pissutsit atukkavut eqqarsaatigalugit angusaqarluarpugut. Ajornartorsiuteqarnerpaajusutut nunanut allanut sanilliullugu unammisartut ikittuinnaat peqataaffigisarpavut.

Skærbækimi Sønderjyllandimiittumi sungiusarneq sioqqullugu nunanut allanut unammisartut marloriarlutik Nuummi marsimi maajimilu katersuuttarput. Isiginnaariat kalaallit Skærbækcenterimut isersimasut nuannersumik misigisaqarput.

Kinami kalaallit assammik arsartartut aamma tapersersorneqarput, Erfalasorpullu assammik arsartarfimmi takuteqqinneqarpoq, inuit tallimat niviarsiaqqat malinnaaviginiarlugit Kinaliarput.

Pissanganarpoq

Sungiusaasoq Victoria Budek Svendsen soorunami pissangavoq:

- Assammik arsarluni unammilluarnissarput neriuutigaarput, neriuutigaarpullu angusarissaarnissarput. Soorunami assersuutigalugu Danmarkimut unamminissarput unamminiarnartorujussuussaaq. Qujanartumik unammisarpassuaqassaagut, puljemi unamminerit aallartinneranniit Presidents Cupimut anngunniunnissaq tikillugu.

- Eqqaamasariaqarparpullu ilikkagaqarniarluta peqataassaagut, Victoria Budek Svendsen naggasiivoq.