U19-it aallartilluartut: 81-2-mik ajugaapput
Kalaallit U19-it arnartaasa Canadami assammik arsarlutik nunarsuarmi pissartanngorniunnissamut anngunniunnermi pingasunngornermi unamminerminni siullermi Saint Kitts and Nevis ajugaaffigaat.
U19-it nunarsuarmi pissartanngorniunnissamut anngunniunnermi peqataasut.
Assi: TAAK
OBS: Sungiusaasoq oqaaseqartinneqarluni paasissutissallu ilaneqarlutik allaaserisaq nutarterneqarpoq.
Immaqa nunarsuarmi rekord?
Arnat nunanut allanut unammisartut U19-it Canadami unamminerminni siullermi ajugaarujussuarnerisa kingorna Assammik Arsartartut Kattuffiat, TAAK, Facebookimi quppernerminni taamatut allappoq.
Arnat ulluni makkunani VM-imut anngunniupput, pingasunngormallu siullermeerlutik unammillutik.
Unamminermilu tassani kalaallit nunanut allanut unammisartut 81-2-mik ajugaapput. Caribiameersut Saint Kitts and Nevis unammivaat.
- Taamarsuaq ajugaanissarput naatsorsuutiginngikkaluaratsigu, taamaakkaluartoq nivissat takutitsinerat nuannaarutigeqaarput. Suliakkiutit naammassilluarpaat aammalu ajoqusertoqarani unammineq naammassivarput. Tamarmik aallartilluarput, assullu arsartuutigut isumalluaqaat, sungiussoq Victoria Budek Svendsen oqarpoq.
Nunarsuarmi rekordiliisimariaannaasut
Unamminerup immikkoortuani siullermi Kalaallit Nunaat 41-0-mik siuaqqariarlutik unamminerup naammassinerani 81-2-mik ajugaapput.
- Tamanna paasiniaanermi IHF-ip qulakkeersinnaanngikkallarpaa. Nunanulli allanut unammisartugut uani unamminerminni oqaluttuarisaanermut ilanngunnerat qularnanngilaq, TAAK allappoq.
VM-imut anngunniunneq una IHF-p ataani ingerlanneqartoq naapertorlugu Kalaallit Nunaat ajugaanera nunarsuarmi rekord-itut isigineqarsinnaavoq. Siornatigut ajugaaneq annerpaaq tassaavoq Kuwaitip Afghanistanimut 80-9 ajugaanerani (2006), aammalu Ungarnip USA-mut 51-11 ajugaanerani (U18, 2022), TAAK ilisimatitsivoq.
Tulliani Mexicomut unammissapput, taakku USA-mut unamminerminni 21-22-mik ajorsarput.
Unammineq sisamanngornermi nalunaaqutaq 21.00 aallartissaaq.
