TAIKWON-DO-mi EM
Ukiuni arlalinni angusat aatsaat taamak pitsaatigisut
Sloveniami Taikwon-do-mi EM-erneq naammassigaluttuarpoq. Nunanut allanut unammisartut sisamat tamarmik immikkut pitsaasumik angusaqarput, sungiusaasoq Angutinnguaq Tittusen nuannaarluni tulluusimaarlunilu oqaluttuarpoq.
Ukioq manna Sloveniami EM-mertoqarnerani Kalaallit peqataasut ingerlalluarput. Nunanut allanut sungiusaasoq Angutinnguaq Tittusen nuannaarlunilu naammagisimaarinnippoq. - Isumaqarpunga ukioq manna EM-mi unammisartutta takutitsinerat timersuutip siunissarissaarneranik takutitsisoq, taanna oqarpoq.
Asseq: Greenland Taekwon-Do Federation
Taikwon-do-mi nunanut allanut unammisartut tallimat ukioq manna Europami pissartanngorniunnermi peqataapput, taanna ingerlanneqarpoq Sloveniami, peqataasullu tassaapput:
- Lars Lennert Abelsen - angutit 4. Dan
- Inukkuluk G. Lennert - angutit 2. Dan tul-imi.
- Malik Sivertsen aamma Kjeld Lundblad Petersen - inersimasut frikampernerini.
- Angutinnguaq Nielsen - inuusuttut 1. Dan tul-imi.
Tul-imut peqataasut marluk kvartfinalimut anngupput, frikampimi peqataasoq ataaseq anngunniunnermi ajugaaffigineqarluni ingerlaqqinngitsoortoq.
Angutinnguaq Nielsen siulliulluni unamminermut peqataavoq. Anngunniunnerni taanna unammivoq qernertumik qitequtillit tuluit nunaanneersoq skotlandimeersorlu ajugaaffigalugit, ingerlaqqilluni unamminermini Tjekkiamiu naapippaa, taannalu ajorsarfigaa. Tjekkiamiu taanna kingusinnerusukkut nr. 2-nngorpoq.
Inukkuluk G. Lennert ukrainamiut unammisartuannik naapitsivoq ajugaallunilu, ingerlaqqilluni Estlandimeersumik unammisartumik naapitsivoq, dommerillu naliliinerat naapertorlugu 3-2-mik unammisartumut taassumunnga Lennert ajorsarpoq.
Europe ITF Taekwon-do Federation
Lars Lennert Abelsen Spaniamiut unammisartuannik naapitsivoq ajugaallunilu, ingerlaqqilluni Walesimeersumik unammisartumik naapitsivoq, taannalu ajorsarfigalugu. Larsip ajorsarfigisaa taanna kingusinnerusukkut nr. 3-ngorpoq.
Malik Sivertsen anngunniunnerni Spaniamiut unammisartuannik naapitsivoq ajorsarfigalugulu, Walesimeersumik unamminermini dommerit unammineq naligiiffiusutut inernilerpaat, taamaalilluni anngunniunnermi ingerlaqqinnissaminut periarfissaq annaallugu.
- EM-imut peqataanermi angusat ataatsimut isigalugit isumaqarpunga ukiuni arlalinngortuni unammisartut ataatsimut angusaat aatsaat taama pitsaatigisut. Ukiuni kingullerni unammisartut ataasiakkaat angusarissaartarput unamminernilu ingerlaqqittarlutik, massakkulli unammisartut tul-imi tamarmiullutik ingerlaqqeqattaarput kvartfinalemilu unammillutik, aammalu nunat nukittuunik unammisartullit ilaatigut ajugaaffigalugit. Taamatuttaaq frikampimi unammisup takutitai unamminermi ingammik kingullermi assut naammagisimaarnarlutik. Immikkut aamma maluginiagassaavoq unammisartut marluk aatsaat unamminermi taama angitigisumi peqataammata, taamaattumik isumaqarpunga siunissaq neriulluarnartoq, unammersuarnerup naammassinerani nunanut allanut unammisartut sungiusaasuat Angutinnguaq Tittusen naliliivoq.
Ilanngullugu Angutinnguaq Tittusen Sermitsiap nittartakkatigut nutaarsiassaqartitsivianut oqarpoq EM-mut peqataaneq maanna nalilersorneqartussanngortoq aammalu tullissaani nunat tamalaat akornanni unamminerni nunarput sorlernut peqataajumaarnersoq ukioq manna naatinnagu aalajangerneqarumaartoq aningaasaliisoq Elite Sport Greenland peqatigalugu.
