Utoqqaat siusinaartumillu soraarnerussutisiallit timersoqatigiiffii aasaanerani katerittut

Utoqqaat suliunnaarnersiutillillu peqatigiiffii, avannaani Kullorsuarmiit kujataani Nanortalimmut, Nuummi juulip qulinganiit 23-anut katerissapput. Tassani 270-it missiliorlugit peqataassallutik.

Timersoqatigiiffik Qeersaat, Idrætsforeningen Nuuk-mi utoqqaat timersoqatigiiffiat, stævneqarnermi aaqqissuisuupput aammalu ukiunik 25-nngortorsiorlutik nalliuttorsiutigalugu oktobarip aallaqqaataani ukioq manna.

- Peqatigiiffimmi ilaasortat amerlaqisut suleqataaffigisaannik ukiormanna katerinnermik aaqqissuussisuuvoq, peqatigiiffik tusagassiutinut nalunaarummi allappoq.

Katerinneq Hans Egedep Oqaluffiani juulip 14-iani nalunaaqutaq qulinut naalagiaqatigiinnermik aallarnerneqassaaq. Inussivimmi kingorna tamanut ammasumik ammaanersiortoqassalluni.

Kommunalbestyrelsemi ilaasortaq Uju Petersen (IA), unammiuaarnermi illersuisuusoq, ammaanersiornermi peqataassaaq.

Unammiuaarnerit

Juulip aqqaneq-aappaaniit 18-iat ilanngulluhu ullukkut assammik arsarluni natermilu arsaararnermik unammisaqattaartoqassaaq.

Kikkut tamarmik unamminernut isiginnaariarnissamut tikilluaqqusaasut isernerlu akeqanngitsoq Timersoqatigiiffik Qeersaanneersoq Birte Nielsen ilisimatitsivoq. Ullormut pilersaarut Inussivimmi Timersoqatigiiffillu Qeersaap Facebookimi quppernerani takuneqarsinnaavoq.

Pikkorissartitsinerit aamma workshoppit

Timersornerup saniatigut Kangillinnguit Atuarfiani juulip 19-aniit 22-anut sungiusaanermut, IT-mut uummarsaanermillu pikkorissartitsisoqassaaq. Pikkorissartitsinerit taakkua peqataasut piginnaaneri ineriartortinnissaat inuiaqatigiinnullu iluaqutaasumik sunniuteqarsinnaanissaat qulakkeerniarlugu siunertaqarput.

Powered by Labrador CMS