Victoria: - Niviarsissat tunniutiinnanngisaannarput - susoqaraluarpalluunniit

Nunarput sinnerlugu unammisartut Canadamut aallarput IHF Trophy-mut peqataajartorlutik, anngunniunnermi unammisartut tamarmik imminnut unammisaqattaarput, angusarissaarnerpaallu holdit marluk VM-imut anngutissapput.

Unammiartorlutik aallaramik pingaarnerusumik siunertaraat nunat tamalaat akornanni unamminerni misilittakkanik pissarsinissaq. Taamaattorli misilittagaqarneruliinnanngillat, maannamummi U19 arnat nunanut allanut unammisartut tunniusimanerat aammalu ataatsimoorlutik takutitsilluarnerat angusarissaarnerannik kinguneqarpoq.

Tassami maanna pitsaanerpaat marluk akornanniissinnaagunik VM-imut anngussinnaalluarput:

- Kisianni aamma periarfissaqarpugut angusarissaarnerpaat pingajuusinnaalluta imaluunniit sisamaasinnaalluta, ullumikkullu unammisassat kingulliit qanoq inissikkumaarnitsinnut apeqqutaapput, U19-it arnat inuusuttut nunanut allanut unammisartut sungiusaasuat, Victoria Budek Svendsen, annertuuliorpasigani oqarpoq.

Sapaat tassaavoq ulloq unammiffik kingulleq

Ullumikkut Sapaat tassaavoq ulloq unammiffik kingulleq anngunniunnermi matumani, tassani Kalaallit Nunaat Canadamut unammissaaq, tassa imaappoq Canadamiut nunaminniillutik unammissapput (hjemmebane).

- Arnat inuusuttut ajunngeqaat, ingerlalluarput aammalu ajoqusernerit maannamut pinngitsoortippagut, tunniutiinnanngisaannarput, aammalu tunniusimallutik peqatigiinnerat qaffasippoq, taamaattumik aama ullumikkut unammiffimmi kingullermi unamminissatsinnut piareersimavugut, nunanut allanut sungiusaasoq Victoria Budek Svendsen Sermitsiamut oqarpoq.

Kalaallit Nunaat Saint Kitts and Nevis-imut 81-2-mik ajugaavoq

Arnat inuusuttut unamminerat siulleq, pingasunngorneq 16. juli ingerlanneqartoq, ilimagisamit allaanerusumik ingerlavoq. Unammineq suli aallartinngitsoq naatsorsuutigineqaraluarpoq naligiikannersumik unammineq ingerlanneqassasoq. Kisianni unamminermi Kalaallit Nunaat agguaqatigiissillugut unamminerup minutsii tamaasa minnerpaamik målimik ataatsimik isertitsisarpoq, tassami unammineq naammassimmat 81-2-mik Kalaallit Nunaat ajugaavoq.

- Taamarsuaq ajugaanissarput naatsorsuutiginngikkaluaratsigu, taamaakkaluartoq nivissat takutitsinerat nuannaarutigeqaarput. Suliakkiutit naammassilluarpaat aammalu ajoqusertoqarani unammineq naammassivarput. Tamarmik aallartilluarput, assullu arsartuutigut isumalluaqaat, nunanut allanut sungiusaasoq Victoria Budek Svendsen unammereernerup kingorna oqarpoq.

Mexicomut unammineq naligiiffiuvoq

Aqaguani, tassa sisamanngornermi arnat inuusuttut Mexicomiut naapippaat. Unammineq taanna allaanerulluinnartumik ingerlanneqarpoq, tassami unammineq naligiiffioqimmat arnat sungiusaasortik peqatigalugu eqqarsarluartariaqarsimapput taktikikkut pilersaarusiorlutik. 

- Arnat inuusuttut unamminerup immikkoortuani siullermi 12-15-imik ajorsarput. Kisianni arnat piumassuseqarput unamminermilu nikalloratik tamaviaarnertik ingerlatiinnarlugu, dommerillu naggammik siggarnissaata tungaanut ilungersornerat imminut akilerpoq, unammineq naligiiffiusumik 26-26-mik inerneqarluni.

Puerto Ricomut ajugaapput immikkoortumi siullermi ajorsareerlutik

Arnat unamminerup naggatissaa tikillugu, tassa dommerip naggammik siggarnissaa tikillugu tamaviaarsinnaalluarnerat tallimanngornermi Puerto Ricomut unamminermi aamma uppernarsineqarpoq. 

Arnat Puerto Ricomut tallimanngornermi unamminerup immikkoortuani siullermi 15-12-imik ajorsarput. Kisianni unillatsiareernerup kingorna arnat inuusuttut tamaviaarput sekundimilu kingullerpaami isertitsipput, taamaalilluni 29-30-imik Kalaallit Nunaat ajugaavoq.

USA-mut unamminermi ajorsarneq

- Unamminerup immikkoortuani siullermi unammilluaqaagut, isumaqatigiissutivut malillugit unammilluta, soorlu illersuinissamut pilersaarutivut iluatsippagut, taamaalillutalu immikkoortumi siullermi ajugaavugut målimik ataatsimik nikingalluta (10-11). 

Taamaattorli unamminerup immikkoortuisa aappaani unammisartut anguniakkatsinnik qimatsisoorput:

- USA-p unammisartuisa assersuinissartik toqqarsimavaat, pilersaarutigullu taamaattumik iluatsinngillat, assersuinnaratalu sakkortusaarput, kisianni aamma tassani tulluusimaarutigaarput arnat isertitat allassimaffiat apeqqutaatinnagu naggatissaa tikillugu tamaviaarmata, kinguarsimagaluarlutillu unammerusussisiat allanngunngimmat.

Kalaallit Nunaata unamminerup immikkoortuani siullermi ajugaareernermi kingorna, USA sukasavilluni uterpoq, unamminerlu USA-mut 31-22-mik inerneqarpoq.

Unnugu Canada naapissavaat

Pingasunngornermiit U19 arnat inuusuttut nunanut allanut unammisartut ullut tamaasa IHF Trophy anngunniunneq ingerlappaat, unamminerillu taakku naammassippata nunat marluk angusarissaarnerpaat VM-imut anngutissapput.

Unngugu Canada unammisartutta naapissavaat, taanna unammisaqattaarnerni ataasiinnarluni ajorsarnikuuvoq, tassa Mexicomut ippassaq unamminermini ajorsarmat, Mexicolu Kalaallit Nunaata sisamanngormat naligiiffiusumik unammereerpaa.

- Ullumi unamminerit kingorna, nunat pingasut assigiimmik pointitigut angusaqarsimasinnaassapput, taamaattoqassappat, nunat akunnerminni  unammisaqattaarnermi angusaasa aammalu isertitsinerit inissisimanerput aalajangissavaat, kisianni aamma Mexicop Puerto Ricollu unamminerat qanoq inerneqarumaarnersoq apeqqutaassaaq, arnat inuusuttut U19-it nunanut allanut unammisartut sungiusaasuat Victoria Budek Svendsen naggataatigut oqarpoq.

U19 arnat inuusuttut anngunniulluni unammisaqattaarnermi massakkut ingerlanneqartumi unamminerat kingulleq unnugu nal. 21:00 pissaaq, tassanilu Kalaallit Nunaat Canadalu unammissapput.

Unamminerit takorusukkukkit, IHF-p kanalimi malinnaasinnaavutit MAANA.