USSASAARUT
Nunat avannarliit maanngaannaq eqqaaneq pitinnagu pinaveersaartitsinissaq pillugu suliniuteqarput
Tiitorfik silami issiavimmut puigorneqartoq, sikup puukua igitaq, igitassaq kaasarfimmiit nakkartoq — piarinaatsoorluni iliuuserisaq eqqanik pilersitsisinnaavoq.
Maanna nunani avannarlerni soqutigisaqaqatigiit arfineq-pingasut piarinaatsoorluni maanngaannaq eqqaasarnerup pinaveersaartinnissaa anguniarlugu suliniuteqarput aammalu ataatsimut oqariartaatsimik pilersitsinissaq anguniarlugu suliniuteqarlutik.
Tiitorfik puigorneqartoq, sikup puukua igitassallu kaasarfimmiit nakkartut sutigut assigiiffeqarpat?
Tamakku tamarmik aqqusinerni pinngortitamilu igitattut inissisimalersinnaapput.
Nordic Alliance on Marine Litter (siornatigut Nordic Coastal Cleanup) aqqutigalugu nunani avannarlerni soqutigisaqaqatigiit immami nunamilu eqqakkanik pinaveersaartitsinermik suliniuteqartarput. Soqutiigisaqaqatigiit maanna ataatsimut attaveqatigiinnermik, ulluinnarni iliuuserisartakkavut annikitsunnguit eqqaganngortitsisinnaasut pillugit ilisimasaqarnerulersitsiniarluni suliniuteqalerpoq.
Nunani avannarlerni piarinaatsoorluni maanngaannaq eqqaasarneq pillugu oqariartaatsimik ataatsimoorfiusinnaasumik pilersitsisoqarsinnaanersoq aamma misissuiffiginiarpaat.
’Eqqakkanik siaruarterinermik pissusilersorneq pinngikkaluarlugu, avatangiisitsinnut igitsinnginnissaq pillugu oqariartaatsimik tamatsinnik atorneqarsinnaasumik amigaateqarpugut. Astrid Kordal Næss, Hold Norge Rent-mi suliniummi pisortaq oqarpoq.
Ateq pillugu siunnersuutinnut nassiuguk uunga csr@csr.gl
Nunat killeqarfii akimorlugit mingutsitsineq pisinnaasarpoq
Nunat killeqarfii akimorlugit mingutsitsineq pisinnaasarpoq. Eqqakkat pinngortitamiittut immamiittulluunniit anorimik, sarfamik ungasissumut ingerlanneqarsinnaapput.
Nunani avannarlerni soqutigisaqaqatigiit ukiorpassuarni suleqatigiinnermikkut nunat immikkoortuini eqqakkat pillugit ilisimasaqarluarput. Paasissutissat tamakku tunngavigalugit nunani avannarlerni isumassarsiaq nutaaq, isiginnittaatsinik pissusilersornermillu ajunngitsumik allannguinissamik suliniut, maanna piviusunngorpoq.
Eqqakkat aqqusinermut igitat piaarinaatsoornermik peqquteqarsinnaapput. Piarinaatsoorneq, allamut saattoorneq, ulapinneq ulluinnarniluunniit iliuutsivut annikitsunnguit qanoq kinguneqarsinnaanerat pillugu eqqarsaatigisannginnerat pissutasinnaapput. ‘Taamatut pisoqartillugu neriuppugut eqqakkanut tunngatillugu inuit amerlanerusut ileqqut eqqumaffiginnerulissagaat’, Astrid Kordal Næss oqarpoq.
Piarinaatsoorneq eqqakkanik pilersitsisinnaavoq
Ulluinnarni pisartut inuit amerlanerpaat ilisarisinnaasaat suliniummi sammineqarput. Kaasarfinni tigusiniarlutit puukoq kaasarfimmiit nakkartittoorsinnaavat. Tiitorfiit silami puiorsinnaavat. Imaluunniit puiaasaq silami eqqaaviup qaavanut ilisat anorimit tingitaasinnaavoq.
Eqqakkat annikitsut uagut iliuuserisagut peqqutigalugit pinngortitamut pisinnaapput.
’Suliniummi inuit ilisimannilernissaat igitallu ikinnerulernissaat anguniarlugu iliuuseqarniarpugut,’ Kordal Næss nassuiaavoq.
Nunani Avannarlerni ilisimasat
Suliniummut atatillugu soqutigisaqaqatigiit misilittagaat, ilisimatusarnerit paasissutissallu eqqagassalerineq pillugu nunanit avannarlerneersut katersorpaat. Paasisat soqutigisaqaqatigiit sammisaanni paasissutissiisarmermilu tunngavigineqartarput
Paasititsiniaaneq inuit attaveqaqatigiittarfiisigut ingerlanneqassaaq, aamma nunani avannarlerni suleqataasunit siammarterneqassaaq.
Eqqakkat qanoq siammartarnersut pillugu annerusumik ilisimaneqarnerulernissaq aammalu tamatta qanoq ililluta aaqqissutissanut peqataasinnaanersugut suliniuteqarnermi anguniarneqarpoq.
Suliniut Nunat Avannarliit Ministeriisa Siunnersuisoqatigiivinit aningaasalersorneqarpoq.