Aatsitassarsiortitseqatigiiffiit
50-it missaanniittut Nunatsinni aatsitassanik ujaasinissamut akuersissutinik 90-it missaanniittunik
maannakkut pigisaqarput. Aatsitassarsiortitseqatigiiffiit arfineq-marluk piiaanissamut
akuersissuteqartutut nalunaarsorsimapput. Aatsitassanut oqartussaasut
akuersissutinik tunniussaanni tamanna atuarneqarsinnaavoq.
Taakkua ilarpassui
akuersissutaateqarfigisaminni aasaq manna misissuiartorlutik,
qilleriartorlutik, uuttortaallutillu misissueqqissaassapput.
Aatsitassarsiortitseqatigiiffiit
50-it missaanniittut Nunatsinni aatsitassanik ujaasinissamut akuersissutinik 90-it missaanniittunik
maannakkut pigisaqarput. Aatsitassarsiortitseqatigiiffiit arfineq-marluk piiaanissamut
akuersissuteqartutut nalunaarsorsimapput. Aatsitassanut oqartussaasut
akuersissutinik tunniussaanni tamanna atuarneqarsinnaavoq.
Taakkua ilarpassui
akuersissutaateqarfigisaminni aasaq manna misissuiartorlutik,
qilleriartorlutik, uuttortaallutillu misissueqqissaassapput.
Ingerlatanik
paasissutissiineq
Aatsitassarsiortitseqatigiiffiit
misissueqqaarnissamut imaluunniit misissueqqissaarnissamut akuersissutaatillit
ukiut tamaasa maajip aallaqqaataa nallertinnagu, Aatsitassanut Aqutsisoqarfik
akuersissutaateqarfigisaminni sunik suliaqarniarlutik pilersaaruteqarnerminnik
ilisimatittussaavaat. Suliassammi amerlanerpaartaat immikkut
akuersissuteqarnissamik pisariaqartitsipput.
Tamatuma
saniatigut ilisimatusartut allallu ilisimatuussutsikkut misissuinissamut
akuersissummik pigisaqartut aamma misissuinissaminnut akuersissummik
qinnuteqartussaapput.
Qinnuteqaatit
62-it
Aatsitassanut
Aqutsisoqarfik 2025-mut atatillugu aasaanerani misissuinissanut qinnuteqaatinik
62-inik tigusaqarsimavoq. Misissuinissat amerlanersaat Kommuneqarfik
Sermersuumi pisussaapput. Aasaanerani misissuinissanut qinnuteqaatit 27-t
nalunaarsorneqarsimammata. Kommune Kujalleq qinnuteqaatinik 19-inik
tigusaqarpoq, Qeqqata Kommunia qulinik, Avannaata Kommunia qulingiluanik aamma
Kommune Qeqertalimmi Nunamilu Allanngutsaaliukkami ataatsimik
misissuisoqassalluni. Misissuinerit ataasiakkaat kommunit killeqarfii
akimorlugit pisarput. Taama pisoqartillugu kommunit pineqartut marluusut
misissuisunit oqaloqatigineqartarlutik. Aatsitassanut Aqutsisoqarfik
tusagassiuutinut taama nalunaaruteqarpoq.
Tusarniaanerit akissutigineqartullu
Qinnuteqaatit maanna
pisut pineqarput, aatsitassarsiortitseqatigiiffiimmi ukiup ingerlanerani
kingusinnerusukkut aamma qinnuteqarsinnaasarmata.
Aatsitassanut Aqutsisoqarfik aasaanerani
misissuinissanut qinnuteqaatinik tigusaqareeraangat, qinnuteqaatigineqartoq
oqartussanut attuumassuteqartunut tusarniaassutigineqartarpoq, ilaatigut
kommunimut attuumassuteqartumut. Tusarniaaneq aallaavittut sapaatip akunnerini
pingasuni ingerlanneqartarpoq. Tusarniaanermut akissutigineqartut tiguneqartut
qinnuteqartumut ingerlateqqinneqartarput. Qinnuteqammut tunngasut,
tusarniaanermut akissutit tiguneqartut qinnuteqartullu tusarniaanermut
akissuteqaatinut qisuariaataat tunngavigalugit Aatsitassanut Aqutsisoqarfik
aasaanerani misissuinissamut qinnuteqaat akuerineqassanersoq
itigartinneqassanersorluunniit aalajangiisarpoq. Aasaanerani misissuinissat
akuerineqartut tamarmik Saffiugassanut quppersakkami, juulimi 2025-mi
saqqummersinneqartussami ilanngunneqassapput.
Aatsitassanut Aqutsisoqarfik misissuinissanut qinnuteqaatinik 2024-mi 35-nik
tigusaqarpoq. 2023-milu misissuinissanut qinnuteqaatit 31-t pineqarput.
