19-inik ukiulik Tunumi aallaasersorluni toqutsisutut ukiuni qulini pineqaatissinneqartoq
Angut 19-inik ukiulik Tiilerilaami toqutsisimasutut inunnullu arfinilinnut toqutseriarsimasutut eqqartuunneqarpoq. Taanna ukiuni qulini pineqaatissinneqarsimasunut inissiisarfimmiittussanngortinneqarnera ataasinngornermi aalajangiunneqartoq, Kalaallit Nunaanni unnerluussisussaatitaasut paasissutissiipput.
Tasiilami eqqartuussineq pivoq.
Assi: Oscar Scott Carl
Tiilerilaami siorna aallaasersortoqarnerani eqqartuussut Eqqartuussisoqarfik Sermersuumi saqqummiunneqarpoq. Siorna aallaasersortoqarmat angut toqutaavoq arnarlu ikilerneqarluni.
Angut 19-inik ukiulik pinerlunnini pissutigalugu ukiuni qulini pineqaatissinneqarsimasut inissiisarfimmiittussanngortinneqarpoq.
Angutip eqqartuussut akuerigaa, Kalaallit Nunaanni unnerluussisussaatitaasoq inuit attaveqaqatigiittarfianni X-imi allappoq:
- Angut Tunumiu 19-inik ukiulik pineqaatissiissutit piffissalikkat sakkortunerpaartaannik ullumi pineqaatissinneqarpoq – novembarip 30-ani 2024-mi toqutsisimasutut inunnillu arlalinnik toqutseriarsimasutut ukiuni qulini pineqaatissinneqarsimasunut inissiisarfimmiittussanngorlugu Eqqartuussisoqarfik Sermersuumi aalajangerneqarpoq, unnerluussisussaatitaasoq allappoq.
Illup tungaanut aallaasaartoq
19-inik ukiulimmut unnerluussummi allassimasut aallaavigalugit Sermitsiap siusinnerusukkut allaaseraa.
Angut inuusuttoq illumut ungasinngisaminiittumut arlalinnik inoqartumut aallaasaarsimavoq.
Angut 33-nik ukiulik arnarlu 36-nik ukiulik niaqqumikkut eqqorneqarput.
Angut sakkortunermik ikilerneqarpoq, aqaguanilu toqusutut nalunaarutigineqarluni. Arnaq annikinnerusumik ajoquserpoq. Taakku eqqorneqartut aapaariiupput.
Angut inuusuttoq inunnut tallimanut allanut toqutseriarsimasutut aamma unnerluutigineqarpoq, taakkuli sumiiffimmiipput aallaasersornermilu eqqorneqaratik.
