Tiilerilaami siorna aallaasersortoqarnera allaaserineqarnikooqisoq Eqqartuussisoqarfik Sermersuup ulluni makkunani suliarineqassaaq. Taamani angut inuartarineqarpoq arnarlu ikiligaalluni.
Siorna novembarip 30-anni ullaakkut pimmat nunaqarfimmiut anissagunik politiinit mianersoqquneqarput.
Tiilerilaami siorna aallaasersortoqarnera allaaserineqarnikooqisoq Eqqartuussisoqarfik Sermersuup ulluni makkunani suliarineqassaaq. Taamani angut inuartarineqarpoq arnarlu ikiligaalluni.
Siorna novembarip 30-anni ullaakkut pimmat nunaqarfimmiut anissagunik politiinit mianersoqquneqarput.
Politiit namminneq qulimiguulimmik ornigupput angullu taamanikkut 18-inik ukiulik Tiilerilaami ullaap tungaani tigusaralugu. Taanna Tasiilap eqqartuussiviani toqutsisimasutut toqutseriarsimasutullu maanna unnerluutigineqarpoq. Tamatuma saniatigut pinerluttuliornerit annikinnerusut arlallit pillugit aamma unnerluutigineqarluni.
Angut inuusuttoq ukiuni qulini pineqaatissinneqarsimasunut inissiisarfimmiittussanngortinneqassasoq unnerluussisussaatitaasup kissaatigigaa unnerluussummi allassimavoq. Kalaallit Nunaanni ukiuni qulini pineqaatissinneqarsimasunut inissiisarfimmiittussanngortitsineq sakkortunerpaamut tulliuvoq. Killiligaanngitsumik paarnaarussassanngortitsineq sakkortunerpaavoq.
Tusagassiuutini Tiilerilaaq Tiniteqilaamik allanneqartarnikuuvoq. Tunumi nunaqarfik taamatut taaneqartarnikuuvoq, aterlu taanna politiit aamma atorpaat.
Arfinileriarluni toqutseriarsimasutut unnerluutigineqartoq
Angut inuusuttoq illumut ungasinngisaminiittumut arlalinnik inoqartumut aallaasaarsimasoq, unnerluussummi allassimavoq. Angut 33-nik ukiulik arnarlu 36-nik ukiulik niaqqumikkut eqqorneqarput.
Angut sakkortunermik ikilerneqarpoq, aqaguanilu toqusutut nalunaarutigineqarluni. Arnaq annikinnerusumik ajoquserpoq. Taakku eqqorneqartut aapaariiupput.
Angut inuusuttoq inunnut tallimanut allanut toqutseriarsimasutut aamma unnerluutigineqarpoq, taakkuli sumiiffimmiipput aallaasersornermilu eqqorneqaratik.
Taamaalilluni unnerluussisussaatitaasup arnat pingasut angutillu pingasut toqoriarneqarsimanerat uppernarsarniartussanngorpaa. Taakku tamarmik uppernarsaasutut aggersarneqarput.
Aallartingajalersoq
Unnerluutigineqartoq – unnerluussut naapertorlugu – Tiilerilaami arfininngornermi ullaaq taanna arlaleriarluni aallaasersorpoq, ilaatigut Pilersuisup matuanut silarlermut. Angut taamaammat akisussaassuseqanngitsumik aallaasersorsimasutut, aserorterisimasutut inummullu sioorasaarisimasutut aamma unnerluutigineqarpoq.
Aammattaaq unnerluussutit arlallit novembarip 30-ani pisunut attuumassuteqanngitsut, soorlu Pilersuisumi imigassamik tillinniarneq, allassimapput.
Unnerluutigineqartoq Nuummi maannamut tigummigallarneqarpoq, 19-inillu ukioqalereerluni. Unnerluussutit qanoq isumaqarfigineranut oqaaseqartinnissaa iluatsissinnaasimanngilaq.
Suliaq pingasunngornermi Tasiilami Eqqartuussisoqarfik Sermersuumi aallartinneqartussaagaluarpoq, timmisartornissarli taamaatiinnarneqarmat eqqartuussinissaraluaq kinguartinneqarpoq.
Timmisartoq Nuummiit Kulusummut pingasunngornermi ualikkut mippoq, Tasiilamilu eqqartuussinissamut suleqataasussat tamarmik tikissimassappata suliaq aallartissaaq. Eqqartuussineq ulluni tallimani ingerlassasoq naatsorsuutigineqaqqaaraluarpoq, arfininngorneq ilanngullugu. Sapaatip-akunnerata tulliani ataasinngornermi suliaq naammassineqartussatut pilersaarutaagaluarpoq.
